SALMOS 39:5-13

⁵Techmacatoc se nemilistli catli nelquentzi xihuitl. Huan nochi xihuitl catli niyoltos elis san se tlatoctzi moixpa, pampa ta nochipa tiitztoc. Nochi masehualme polijtehuaj nimantzi san quen ixpolihui iniijiyo quema tlaijiyotilanaj.

⁶Nochi masehualme panotehuaj quen se ecahuilotl. San tlapic nochi inintequi. Masque quimiyaquilíaj tlamantli catli ipati, amo quimatij ajqueya iaxca elis teipa.

⁷Huajca, noTeco, amo tleno onca catli ipan huelis nimotemachis. Nimochiyas san ipan ta.

⁸Techmaquixti tlen notlajtlacolhua. Amo xiquincahuili masehualme catli huihuitique ma noca paquica ica catli nijchijtoc.

⁹Nimocamatzacuas moixpa huan ayacmo nimolinis ica catli nopanti, pampa ta techtlatzacuiltía.

¹⁰Pero noTeco, ayacmo techtlatzacuilti. Nijmati nimiquis pampa techpanajsitoc.

¹¹Quema se masehuali tlajtlacolchihua, ta tijtlatzacuiltía. Nopa tlamantli catli más quiicnelía, tiquixpolihuiltía quen mejtolime quitlamicualoltíaj se yoyomitl. Niyon se masehuali amo quipiya chicahualistli. Nochi itztoque san quen se ajacatl catli ica se tlatoctzi panotehuaj.

¹²NoTeco, xijtlacaquili quema nimotlatlajtis. Techtlacaquili quema nimitztzajtzilía. Amo san xitlachixto quema nimochoquilía, techpalehuiqui. Quen nochi nohuejcapan tatahua, san niitztos nica se tlatoctzi. Quen niehuasquía seyoc altepetl huan san nipanosquía, amo nihuejcahuas nica.

¹³Ayacmo techtlatzacuilti. Techcahuili sempa ma nijpiyas fuerza huan se quentzi paquilistli pampa se tonal nimiquis huan ayacmo niitztos nica.”