Kap 39:5-13

⁵Nak dakon bɨsap pɨsɨpmɨsok yɨpgul. Gak da dabɨlon nak dakon bɨsap yo ɨsalɨ. Amɨn kɨnda da mɨrɨm yawɨk pɨsosok, amɨn morap uŋun da tɨlak mɨktɨmon bɨsap pɨsɨpmɨsok gɨn ekwaŋ.”

⁶Amɨn morap gɨldat paŋopmon wupnin noman taŋek tepmɨ pasɨlgaŋ uŋun yombem. Yo morapmɨ tɨmɨt do pi madepsi aŋ, mani pi madep aŋ uŋun bamɨ mɨni. Amɨn da yo morapmɨ paŋmuwukgaŋ, mani namɨn da tɨmɨtjak uŋun dɨma nandaŋ.

⁷Mani Amɨn Tagɨ, abɨsok nak nido jomjom asat? Nak gak do nandaŋ gadaŋek gak dagɨn aŋpulugoki do jomjom asat.

⁸Yokwikon naŋ abɨdaŋek dɨwarɨ morapno wɨrɨrɨk nabi. Yum pɨndagaki nandaŋ kokwini tagɨ dɨma amɨn da yaŋsul dɨma aŋ namni.

⁹Mani nak gen dɨma yosot. Nak gen mapmɨt gɨn asat. Nido, gak da gaga nak do yo uŋun asal.

¹⁰Saŋbeŋek tepmɨ pi dɨma nabi. Obɨsi nɨkgɨl, do tapmɨmno mɨnisi asak.

¹¹Gak da amɨn tebai yoyɨŋek yokwini dakon kobogɨ yomɨsal. Yo monɨŋ da ɨmal kɨnda naŋba yokwi tosok, uŋun da tɨlak yo morap uŋun do galak tosok uŋun wagɨl wɨrɨrɨkbɨ pasɨl mudoŋ. Amɨn kɨnda da mɨrɨm pɨsosok, amɨn morap uŋun da tɨlak mɨktɨmon bɨsap pɨsɨpmɨsok gɨn ekwaŋ.

¹²Yawe, bɨsitno nandaki. Aŋpulugoki do yaŋ tɨdosot uŋun do mɨrak pakyaŋsi yopbi. Mɨrakgo dɨma sopbi, nido gak gat bɨsap pɨsɨpmɨsok gɨn mɨktɨmon egɨpdamak. Nak babɨkno yombem. Uŋun kɨsi bɨsap pɨsɨpmɨsok gɨn mɨktɨmon egɨpgwit.

¹³Saŋbeŋek yo yokwisi dɨma aŋ nabi. Yum nandaŋaki butno ae tagɨsi asak. Aŋaki don kɨmagek on mɨktɨm wagɨl yɨpmaŋ dekgeŋ.