SALMOS 143:2-11

²Amo ximochihua quen se juez huan techtlajtolsencahua, pampa moixpa ta amo aqui se masehuali catli itztoc xitlahuac.

³Nocualancaitacahua nechtepotztocatoque huan nechitzquijque. Nechtlahuisojque huan nechchihualtíaj ma niitzto ipan tzintlayohuilotl quen catli ya mictoque.

⁴Nelía senquistoc nimoyoltequipachohua, hasta ayacmo nijmati tlaque nijchihuas.

⁵Niquelnamiqui quenicatza eltoya ipan nopa tonali catli panoc. Nimonejnehuilía tlen nochi huejhueyi tlamantli catli tijchijqui.

⁶Yeca nimomatlanana moixpa huan nimitztemohua. Ipan noyolo tlahuel nimitznequi quen se tlali catli huactoc quinequi atl.

⁷TOTECO, nimantzi technanquili pampa tlahuel nitlaijiyohuía ipan noyolo. Amo ximoicancuepa tlen na para amo nimiquis.

⁸Ica ijnaloc, technextili motlaicnelijcayo, pampa ipan ta nimotemachijtoc para techmocuitlahuis. Technextili nopa ojtli catli monequi nijtoquilis, pampa san ta nimitzilhuía catli eltoc ipan noyolo.

⁹TOTECO, techmanahui tlen nocualancaitacahua, pampa ipan ta nimotemachía para amo tleno nopantis.

¹⁰Techmachti ma nijchihua catli ta tijnequi pampa ta tinoTeco Dios. MoTonaltzi ma nechyacana campa cuali nopa ojtli.

¹¹TOTECO, techmaquixti para ma monextis mohueyitilis. Techquixti tlen ni tlaijiyohuilistli pampa ta tijchihua catli xitlahuac.