GWAY GI IDAWUU’D 143:2-11

²Dhalku/ ki cic̱ mo e mo jin dwallu gwo nyaḵki c̱iŋkinam pini mo haali/ wathiŋ kamu/ yisa di’da jin di’d ki e jin ta’da ḵar/e ibwambori /e mo.

³Haali/ wathi/ jin ta ’kup̱ mo tani a’di urki aha/ isho’k mo. A’di yap̱ki mondiki/em pem ki sho’k itaga ’cesh mo. A’di ki kar aha/ mmoc̱a’b e mondhurumi’d mo me’d uni gwansan kun wukin ki wuŋ gana/ mo.

⁴Gom gwo gi wakan mo tani shi/in pem ’thikina buye/ e isi aha/ mo, dhali adum pem e isi aha/ mo tani a’di tintira/ tintir mo.

⁵Aha/ kakina teen dhamo/ gunn e mo. Aha/ kulumkina gwo ibwa goma ris to kun miikina /e mo. Dhali aha/ ṯikirk ina gwo kulumi bwa gom miin to ki me’d pini kun wagaskina /e mo.

⁶Aha/ he’thkina me’d pem gom /e mo. Aḵashiram pem ḵu’thkina ’kus guŋkuru/ mo me’d mo ma burṯa/ o’d mo. Doshi ma dhali ’cunycuri yan mo.

⁷Huru/ ki jahanne/ mo dhali thoḵ aha/ ’twa/ mo, ayy Tap̱a. Shi/in pem ushi me’d mo. Dhalku/ ki bag jis/em pini ’peni aha/ mo, isi ciki/ ki aha/ mina e wa ki uni gwansan kun iikin ka luŋgu’b e jisa ’kulga/ mo.

⁸Dhalki aha/ ciḵa gwo mon’thamo/ gom mo/en pini jin ṯelu sho’k mo, haali/ e /e mo tani aha/ kara mom pem jin gamka/ gwo is mo. Ṯori aha/ bway jin miga/ ’taki ya mo, haali/ e /e mo tani aha/ ’de’kkina aḵashiram pem ’kup̱ ki mis mo.

⁹’Cuḵi aha/ mo, ayy Tap̱a, ’peni aris ’kwani kun ta ’kup̱ ki aha/ mo. Aha/ guskina mmohur jwa e /e mo.

¹⁰Ṯori aha/ gwo mmomii bwam pini mo, haali/ /e tana Arumgimis pem mo. Dhalki shi/in pini jin ’boro’d shu aha/ bway mo e bway jin ba’daba’d mo.

¹¹Gom gway gi gway pini mo tani, ayy Tap̱a, ’tashi mondiki/em pem ’twa/ mo. E mii ma ḵar/em pini mo tani susi aha/ ka pije/ ’peni monṯo’c bwa mo.