Kölfel 143:2-11

²Kosap atolongaei lon om kapwüng, ngang noum chon angang, pun esap wor eman aramas mi manau a pwüng fän mesom.

³Iwe, ewe chon oputaei a tapweriei o purieitiu lepwül. A anomuei lon rochopwak usun chokewe mi mäla me lom.

⁴Iei mine üa apilükingau, nge lelukei a fokun niuokus.

⁵Üa chechemeni ewe fansoun lom o ekieki usun mine ka fen föri. Üa ekieki usun om kewe föför.

⁶Üa aitietä pei lon ai iotek ngonuk, ngüni a kakaituk usun eu fanü mi pwasapwas a kakaiti üt.

⁷Ai Samol mi Lapalap, kopwe müttir le pälüeniei, pun üa fokun apilükingau. Kosap aopa mesom seniei, pwe üsap wewe ngeni chokewe mi tolong lon ewe lenien sotup.

⁸Iteiten lesosor kopwe pwäri ngeniei om tong ellet, pun üa anomu ai apilükülük womw. Kopwe aiti ngeniei ewe al üpwe fetal won, pun üa suki ngonuk lelukei.

⁹Ai Samol mi Lapalap, kopwe angasaei seni ekewe chon oputaei. Üa sü ngonuk pwe üpwe op reöm.

¹⁰Kopwe aiti ngeniei usun ai üpwe föri letipom, pun en ai Kot. Ngünum mi mürina epwe emweniei won efoch al mi sosonöch.

¹¹Ai Samol mi Lapalap, kopwe tümwünü manauei pokiten itom. Lon om pwüng kopwe emwenieiwu seni ai riaföü.