Salmo 95:1-11

¹Omali kayo ta mankanta ya manragsak tako, ipigsa takon pangdayaw takon Diyos Apo. Maiarig sisyas dakdake ay bato ay pankamangan ta maisalakan tako.

²Emey tako sin sangoanana ay man-iyaman en sisya, manragsak tako ay mangidayaw babaen si kankanta.

³Tan si Yahweh yan manakabalin ay Diyos ya ari ay nangatngato mo din amin ay sinan didiyos.

⁴Iturayana din intiro ay daga manipod sin kaonegan ay liyang enggana sin dontog ay kakayangan.

⁵Oka na abe din baybay tan pinarsua na, siya abe din daga ay inamag na.

⁶Omali kayo ta mandokmog ya manyakog-ong tako ay mandayaw en Yahweh ay namarsua en datako.

⁷Tan sisya din Diyos tako ya datako di ipogaw na ay maiarig si karnero ay ay-ayowanana. Dengngen yo koma ed wani ay agew din kalin Diyos Apo.

⁸Kanana, “Adi yo pakenkentegen din nemnem yo ay kaman din inyat di aap-o yo sin agew ay kawada dad Meriba, sin lugar ay magay omili ed Massa.

⁹Isdi ay pinmadpadas din aam-a yo olay inil-ila da din inam-amag ko.

¹⁰Opatapolo ay tawen ay sinigsigaak daida. Isonga kanak, ‘Kankanayon ay masangsangaw das lawa. Sigaan da ay mangonod sin bilbilin ko en daida.’

¹¹Gapo sin bonget ko inkarik ay adik polos pasgepen daida sin pan-illengan ay enak insagana.”