Samu 95:1-11

¹Nakama ipupwa. Kamongo lakandamana. Anatumi namwa kyawa minyuo karenge dokonasuu pyao rae maiyuo kenane pyamana.

²Namwa banya lenge kambu silyamo dokona karo sangyu lao rae maiyuo kenane rae wakasa maiyuo pingi dupwame pyao baa lakandamana.

³Kamongo baa doko Anatu porai ingyuo karamo. Dokona lao baa kiŋi mupwa isame bange wasisi anatuŋu lao dupwa nyuo isa palyuo karamo.

⁴Kananda koko dorenapiso yuu kyau ama ketae dokona pao baame yuu muu dupwa peparae iso karamo.

⁵Yuupi ipwa kotape baame wasiya dolapo range iso karamo.

⁶Namwa wapambu pii pyaro piso Kamongo namwa wasiyamo dokolakandamana. Ipupwa.

⁷Baa namwana Anatu. Namwa banya wambu mena sipisipi dopale baame nenge joo rapu pyuo karamo. Epapu dokonamwa peparae baame apa letamo lao semana.

⁸Yuu muiyane dokona yuu kingi Meripa lengepe yuu Masa lengepe dolapona nakamana rakange kyawa dupwa mona kana pokapala Anatupa male male lao kamba lao kareyami kande dokonakopalyuo pii nalapape.

⁹Nakamame nambana yulu piyunu doko kando karapalape namba alyungu mambu ingyuo minyuo kui leyami.

¹⁰Ee kana akalisa kisima namba imbu singi nyakayami. Nambame endakalipi yuu peparae kopetame suu pyao karenge, leyo. Nambana nenge rambo lao piso karo pingi doko kamba lao mana nyii nalu nao nayami.

¹¹Namba imbu singi nyepala lalu lao lao, Nambamoo pipya koo sela epa narami, leyo.