SALMOS 95:1-11

¹¡Xihualaca, ma tihuicaca para TOTECO! Quena, ma tihuicaca ica paquilistli para tijhueyimatise Toteco tlen techmaquixtía huan techtlatía para ax tleno techajsis.

²Ma tiyaca iixtla Toteco para tijtlascamatise ica nochi toyolo. Ma tijpaquilismacaca ica huicatl.

³Pampa TOTECO yajaya se Dios Tlen Tlahuel Hueyi. Yajaya nopa Hueyi Tlanahuatijquetl huan ax queja nochi sequinoc totiotzitzi tlen tlacame quinhueyichihuaj.

⁴Imaco eltoc nochi nopa tlacoyoctli tlen más huejcatla huan nopa tepetini tlen más huejcapantique. Nochi iaxca ya.

⁵Yajaya iaxca nopa hueyi atl huan tlaltepactli, pampa yajaya quichijchijqui.

⁶Xihualaca, ma tijhueyichihuaca huan ma timoixtlapachoca hasta tlalchi iixtla TOTECO, yajaya tlen techchijchijqui.

⁷Pampa yajaya toDios huan tojuanti tiitlacajhua. Tiitztoque queja tiiborregojhua tlen yajaya quinmocuitlahuía. Xijtlacaquilica ama tlen quiijtohua:

⁸“Amo ximoyoltetilica queja israelitame quichijque huejcajquiya ipan nopa huactoc tlali tlen itoca Meriba huan Masah.

⁹Nopano imohuejcapan tatahua nechyejyecojque para quiitase tlachque nijchihuasquía. Huan quichijque ya ni yonque ipa ya quiitztoyaj nopa huejhueyi chicahualnescayotl tlen na nijchijtoya iniixpa.

¹⁰Para cuarenta xihuitl nicualantoya ininhuaya, pampa ininyolo huan inintlalnamiquilis eltoya huejca tlen na. Huan hasta ama ax moselijtoque quitoquilise notlanahuatilhua.

¹¹Yeca ica nohueyi cualancayo nitlatestigojquetzqui para ax quema calaquise campa nijsencajtoya ma mosiyajcahuaca.”