1Aniqenavu ihi tivaqi viha Nora Kotira autu tuaheraqi vuare. Viva tinavu antua timiteharo tinavu ruaruama timite vaiva vairara ti, kaiqenavu quaheha noraiqaake ihi tivaqi vuare.
2Aniqenavu viva inaini oru vaiha virara koqeve tivaqi viha, musiki ruqutiha vira autu tuaheraqi vuare.
3˻Ne kiae iriavo?˼ Noravano Kotiva nai Variqa noravanoma vaivo. Una variqa, vo variqa vo variqa variavaro Noravano Kotiva vika uri aatarakero avuni vaivo.
4Maa vatara veva muntukaraqive, vo aiqina vo aiqinave, ekaa vi haikava vi haikava viva i haikavama vaivo.
5Viva nora namari autukero vatairara tiro, vi namariva viva i haikavama vaivo. Vira kauquvano aahara vatavata autu kero vatairave.
6Mintima vaimantara ti, aniqenavu oru hiqintivi vaiha vira autu tuahera kaare. Kaiqenavu oru Noravano Kotiva tinavu autu kero vataira avuqaa tori kauru aravi variare.
7Vivama tinavu Variqavano vaimanta tenavu vira sipisipi vauraro viva tinavuqaa koqema kero raqiki vaivo. Vate ne Kotira uva iriate. Viva mintima tivo:
8Ni kaivaqaukavara aahara vata Masainive Meribainive vaiha, tiriara viva tinavuqaa kiama ho raqikianarove tivakeha, nái avu aato kempukaiqamate vira uva kia iriraiti, variqi vuantemake, nevata mintivorave.
9Te ni kaivaqaukavara nora kaiqa vara nimitaqi vi vauramanta, vika kia virara noraiqaake iriraiti, vika ti avatamake tavarekaqai auti variara.
10Vika mintiaqi vi variara kaara ti arara itaiva 40 ihi variqiro vimanta vaunarave. Te vikara tiha, Maa vaiinti nahentika inaara hampi aaraqaa ni variakave. Vika ti uva raqakeha kia ti aaraqaa ni variarave.
11Vira kaara ti arara itaimanta te tenta kauqu aiqiqaa aqukeha tiha, Te vo vata nimitaainaraqaa vika kiama ho oru auraara vaivarave, tiro. Kotiva minti tura.
Ihi 95
Ihi 95:1-11