Salmos 95:1-11

¹Naanints. Mangooz ksaptari Apareetsich yaseeyani; watam iyaa ksutataw ashku, tapachindakuwa.

²Ashiri Apanllish pang' pshtuyaruni, Apanlleem yaseeyani. Ungirtayani.

³Watam Apanll Taarashipan minamaritawa. Uwamari kapung kasiriya. Apanllputsee ichingaru kasiru, kizpur kurak taakiya.

⁴Tsapurunasee ichingaru ksutkiya. Tsapoo wantsshuchee ksutku, Íwaree machee ksutkitamta. Tsapurunasee ztaru waana amuytakiya.

⁵Kung mar kapungumashee Apanll waana tinarangiya. Tsapoomtam uwpatari patateeru tinarangiya.

⁶Ashirucha, naanints. Ungirtayani Apareetsich. Tuchimtayaruni, wánungeetari ungirtayani Apareetsich. Watam iyaamtam tinaranguwa, atina.

⁷Apanll watacha kaapaniritana yaana Aparini. Iysha Apanlltanicha tiptsirini. Apanll opeej ksutamapan ashiru iyaa wanasiri ksutkiya. Ashiri siysa waanaatsee kuk kitsis mazinangtsa. Watam Apanll siyaa atuwa:

⁸Sirútama zitaminaris tsap apusash Meribash taarangsin, nuwamun mang' tatumaam ngataranganaya.

⁹Nuwaatssha michitaranganaya. Nuw wizpurirpati tapachindarangitaati, nuwaa wizpurireetsi parangitaatssin, itaru nuwamun mang' tatumaam ngataranganaya.

¹⁰Ashiri nuwsha kapung tsiyantaranguri, 40 masach apusap masatarusin naamaam wayarangina. In tputs nda mangpa chinakanaya; kizpur yutarit ashkanaya. Nuwaa kamachtamari wits nda mazinakana.

¹¹Ashirucha, nee zurampatari wanichima. Yuwash tsap taamaam wayarangi anush pshtuchazinllinaja, ndambaree. Anush kanuschazinllinaja, ndambaree, atina, Apanll tárangiya.