Yontu 95:1-11

¹Ɩ́ kɔɔ nɑ tə́ yoo Tɑcɑɑ kɛ lɑŋhʋlʋmlɛ yontu, tə́ sɑ tɑ́ wɑɑsʋlʋ wei tə tʋɣɩ kpʋlʋɣʋ tɔ.

²Tə́ polo ɩ ɩsɛntɑɑ nɑ tə́ sɛɛ-ɩ, nɑ tə́ wiliti-ɩ nɑ lɑŋhʋlʋmlɛ yontu.

³Mpi tɔ, Tɑcɑɑ nyɑɣɑlɛ Ɩsɔ sɔsɔ. Nyɑɣɑlɛ wulɑʋ sɔsɔ wei ɩ ŋmɑkələɣɩ tɩɩŋ tənɑ tɔ.

⁴Nyɑ́ niŋ tɑɑ kɛ́ ɑtɛ lumɑŋ tənɑ wɛɛ nɑ pɔɔŋ sɔsɔɔŋ tənɑ kɛ nyɑ́ nyəm.

⁵Nyɑ́ tənnɑ teŋku, hɑlɩ nyɑ́ tɩɩ lɑpənɑ-ɩ. Kʋlʋm nyɑ́ n lɑpənɑ tɛtʋ nɑ nyɑ́ niŋ.

⁶Ɩ́ kɔɔ nɑ tə́ luŋ tɑ́ ŋmɑlʋ Tɑcɑɑ kɛ ɑkulɑ, nɑ tə́ həntɩ-ɩ ɑtɛ.

⁷Pə tɑɣɑ pʋlʋ, nyɑɣɑlɛ tɑ́ Ɩsɔ. Tɑɣɑlɛ nyɑ́ yəlɑɑ, nyɑɣɑlɛ tiikilu. Tə wɛ kɛ́ ɩsɩɩ nyɑ́ niŋ kɑləkʋ. Ye ɩ́ nɩɩ Ɩsɔ mɑ́ mɑ kʋyɔɣɔtʋtʋ kɛ sɑŋɑ,

⁸ɩ́ tɑɑ lɑ lɑŋkpɩɩsəŋ ɩsɩɩ mə cɑɑnɑɑ kɑ lɑpʋ Melipɑ nɑ Mɑsɑ kɛ wʋlɑɣɑ tɛtʋ tɑɑ tɔ.

⁹Tənɑɣɑ mə cɑɑnɑɑ mɑɣɑsɑ-m sɩ pɑ nɑɑkɩ mɑ wɑɑlɩ, pɑɑ nɑ pɑ nɑnɑ pɑ ɩsəpəle kɛ mpi mɑ lɑpɑ tɔ.

¹⁰Pɩɩsɩ nɩɩlɛ təcu kɛ́ mɑ luɣu lɩɩ piitim pənɛ, hɑlənɑ mɑ tʋ mɑ tɑɑ sɩ yəlɑɑ mpɛ pɑ lepɑɣɑ, pɑɑ nyəŋ mɑ mpɑɑŋ.

¹¹Ḿpʋɣʋ pɑ́ɑ́nɑ́ kpɑ-m nɑ mɑ́ tuu sɩ: Pɑ kɑɑ sʋʋ mɑ hɛɛsʋɣʋ tɑɑ.