Psalm 95:1-11

¹O fahsru, lela kut in kaksakin LEUM GOD, Lela kut in on ke engan nu sin God su langoekut.

²Lela kut in tuku nu ye mutal ke kulo, Ac yuk on in engan ke kaksak.

³Tuh LEUM GOD El sie God ku, El sie tokosra kulana fin god nukewa.

⁴El Leum fin faclu nufon, Liki yen loal in luf uh nu yen fulat in eol uh.

⁵El Leum fin meoa, su El orala, Oayapa faclu su El lumahla.

⁶Fahsru, lela kut in epasr ac alu nu sel, Lela kut in sikukmutunte ye mutun LEUM GOD, su orekutla!

⁷Tuh El God lasr, Ac kut mwet su El nunku kac, Ac un sheep natul su El karingin. Misenge, porongo ma El fahk:

⁸“Nik kowos srangesr lohng kas, oana mwet matu lowos ke elos muta in Meribah, Oana ke len se elos muta yen mwesis Massah.

⁹Elos tuh srikeyu we, Elos ne liye ma nga oru nu selos.

¹⁰Nga tuh arulana toasr selos yac angngaul, Ac nga fahk, ‘Mwet inge arulana likkeke! Elos tia lungse in akos ma sap luk.’

¹¹Nga tuh kasrkusrak ac orala wulela na ku se, fahk mu, ‘Kowos ac fah tiana ilyak nu in acn in mongla se Nga tuh akoo in sot nu suwos.’”