SALMO 27

1

2

3

4

5

6

7

8

10

11

19

23

27

34

37

46

51

53

55

61

73

100

104

119

121

133

139

¹Tata Dios lusninishina kashpa chikniwak runakunamanta salvawan. Chashna salvawaptin mana ni pita manchanichu. Tata Dios amachawaptin mana ni pita manchashachu.

²Chay chikniwak mana alli rurak runakuna tantanakunsapa makawashpa wañuchiwanankunapa. Chashna wañuchiwayta yuyashpankunapish mana atipansapachu.

³Chay aypa chikniwak runakuna wañuchiwanayashpa chawpichawaptinkunapish mana paykunata manchanichu. Sukaman makawanayaptinkunapish mana turbakunichu.

⁴Ñuka Tata Diosta suk imallata mañashkani. Sukaman munani tukuy diya paypa wasinpi yaykuyta payta kuyanaynipa. Chaypi sukaman munani kuyawananta yuyayta.

⁵Sukaman sufrishpa kawsaptini Tata Dios amachawashpa yanapawanka. Chikniwak runakunamanta wasinpi pakawanka. Manllayba rumi sawanpishina churawanka ama ni pi wakllichiwananpa.

⁶Chashna Tata Dios salvawaptin atipani chikniwak runakunata kallpachiyta. Chaypina payta agradesishpayni paypa wasinpi ofrendakunata kusha kuyanaynipa. Kushikushpa himnokunata Tata Diosta kantasha.

⁷A, Tata Dios, kanta roygaptini uyariway. Llakichiwashpa yanapaway.

⁸Kikini yuyanakushpa rimani: “Tata Diosta roygasha yanapawananpa.” Chayrayku, Tata Dios, roygayki yanapawanaykipa.

⁹A, Tata Dios, yanapaway. Ama piñakushpa karkuwaychu. Kanlla atipanki salvawayta. Ama sapallaynita sakiwaychu. Kanmi kanki salvawak Tatayni Dios.

¹⁰Tatayni mamayni sakiwaptinkunapish kan, Tata Dios, mana sakiwashpa yanapawanki.

¹¹A, Tata Dios, chikniwak runakuna makawanayaptinkuna yanapaway allita rurashpa alli ñanpi purikshina kawsanaynipa.

¹²Chay sakra runakuna llullakushpa chatawansapa mana alli rurak kanaynita. Chayrayku ama munaychu munashkankunata rurawanankunapa.

¹³Chashna chatawaptinkunapish ñuka allita yachani tukuy diya kan, Tata Dios, kuyawashpayki yanapawanaykita.

¹⁴Chayrayku akuychi Tata Dios yanapawananchikunata shuyaypachi. Valorchinakushpa ama sampayaypachichu. Ariya, Tata Dios yanapawananchikunata shuyaypachi.