Sabóor 68:3-23

³Yàlla wal, ñu naaw ni saxar. Ñu bon ñi sànku fi kanam Yàlla, mbete dax ak sawara.

⁴Ñu jub ñi nag bég, di bànneexu fi kanam Yàlla, tey puukarewoo mbégte.

⁵Woyleen Yàlla, teral turam, xàllal-leen kiy war niir yi, Ki Sax moo di turam. Bànneexuleen fi kanamam.

⁶Mooy baayoo jirim, di àtte jëtun, kookoo di Yàlla ja fa dëkkuwaayu sellngaam.

⁷Yàllaay sàkkal ku wéet wéttal, di afal ku ñu tëjoon, bégal ko, ku déggadi rekk ay dëkke suuf su ne sereŋ.

⁸Céy Yàlla, yaa génn, jiitu sa mbooloo, daagu, dugg màndiŋ ma. Selaw.

⁹Suuf yëngu, asamaan sóob fi kanam Yàlla, boroom tundu Sinayi, Yàllay Israyil ja!

¹⁰Yàlla, waame nga tawal, leqlee ko réew mi nga séddoo, fa mu sonne,

¹¹sa mbooloo dëkke fa. Yàlla yaa leel néew-ji-doole ci sag mbaax.

¹²Boroom beey joxe ndigal, gàngooru jigéen indi xibaar:

¹³«Buur yaak seeni gàngoor a ngay dawa daw, jongomay kër gi di séddale lël ja.

¹⁴Yeen ñiy waaf ci gétt gi, bésub xare, gànjar a ngi, di laafi pitax yu ñu xoob xaalis, dunq ya teg wurus wuy ray-rayi.»

¹⁵Ba fa Aji Man ji tasaaree buur ya, tawub yuur a ngay sóobe tundu Calmon.

¹⁶Yaw tundu yàlla yi, yaw tundu Basan, tundu Basan, tund wi ci coll yi,

¹⁷looy xeelook say coll, di fiire tund wi Yàlla namma dëkke? Aji Sax ji kat, fa lay dëkk ba fàww!

¹⁸Watiiri xarey Yàlla di ñaar fukki junni (20 000), ba ci junniy junni. Boroom bi ne ca seen biir, di boroom tundu Sinayi fa biir sellngaam.

¹⁹Yaa yéeg fa kawa kaw, jàpp ay jaam, yóbbaale. Yaa nangooy galag ci nit ñi, ba ci ñiy fippu ndax li Yàlla Ki Sax dëkke Siyoŋ.

²⁰Cant ñeel na Yàlla bésoo bés. Moo nuy jaboote. Yàllaa nuy musal. Selaw.

²¹Sunu Yàllaa di Yàlla jiy walloo, Aji Sax ji Boroom beey musal bakkan.

²²Yàlla daal ay rajaxe boppi noonam ak kaaŋ mu sëq mu boroom wéye tooñ.

²³Boroom bi nee: «Basan laay waññee noon yi, waññee leen xóotey géej,