SAM 68:3-23

³Siwan ngana nata nataau amin nomanu apbakngake Anutue kaine musip gwaang natake yutningge nataat. Natake waaminda asiknga bakngake yutningge nataat.

⁴Nin Anutue kap taike umana aknga yatangenatna. Sike i minga musaatang pukwike aminbamu kayuak kapata apikge kepiapana tana nomatawik. Itane umana Buyambam tapa, ge ginda ie kaine apbaknganong.

⁵Anutu inane yotna gapmane yuak. Yuke waatdaka nana gwa kupsatane kayuak. Unzing, waamindane nana binga. Gatu itakan maya apna gwa kupsa kuut kayuke gatayamunggak kapanin.

⁶Sike gatu aminu inatakan yuaingge donga yaman undang take yutning. Siwan itakan kautde yuaing aminu sandepewan yotna paku take yutning. Siwan ngana yamandet sikaing aminu yaniwan paku keu gunzit toknga siknga yasinggak komune yutning.

⁷Anutu, tupa ga tupan kuke gikane amindabamu yanipakapuke keu amina wena komune gaat waaminkat ngang payawawi sukuking.

⁸Sike tapduu waomune Sainai tawandakane miamun sikut. Siwan sopabam takut. Dasingge, Anutu, ga gwa apuyak. Siakan siknga, Isrel nanatane Anutuna, ga gwa api sopa wa tawan miamunu wa sikut.

⁹Anutu, gata sopa take siknga gikane kepdakakae tasiwi takut. Tasiwi sopa tawan keu wai daka ngana gatu take sikut.

¹⁰Gikane amindabamda yot gapma gapma keu andakane mitapbing. Ga take sikngaapa. Siwan gata nanamu sangana wena aminde yamukuyak.

¹¹Buyambam tapata aminabamde wamna yaman aminu kwaapzangga wamu waaknga taku yakapbing.

¹²Sike wamu waaknga anzing, “King kapaapaat gatu amak aminaat kuupbam gwa datakuking. Siwan maya yotna yukingga sanga wawita amak gwene pakingu usanzike paking.

¹³Ginda amak tasinangge natake keu komdu kuke zikaane katap sake undang dapuna petning. Siwan mayata tauknga gitza siknga silwa gatu gol ngang yaniata pasia pasike kawa take siknga kwait danggam binga sikut. Gupnaapa waenga silwa binga siwan pia sayau waenga goldane kaamang binga gupnaapa unzing sikut.”

¹⁴Sike Anutu kekekngana bamban tapata tawanu Solmon ngang inikaing dakane king tapatu tapatu yanikwasiwan kaut kaut datakuking. Unzing sopa zambam ngang yanikaingu tawanu wandakane kaut kaut tasiwan takut.

¹⁵Tawanu Basan kep komune yuaing dakandaka buyambam siknga. Siwan wandakandakane tawa tawanu buyambam siknga.

¹⁶Ginu tawanu Basan kep komune dakandaka tawa tawanu buyambam siknga, ginu dasingge tawanu dakatu Anututa yutnangge yawan yukut dakae sanga moo binga ngangu kake nataaing? Sike Buyambam tapata tawanu wandakane asinggan asinggan yuwik.

¹⁷Buyambam tapata tawanu Sinai daka teke apu inane yotna buyambam gwekatang kopbut. Sike wa apiu amak amina kwaapzang siknga tekwanziu karis ngang yanikaingu kekeknga amakgane gwegwene yuwa yanipakapuke iat gatake kopbing.

¹⁸Anutu, tapduu gata tawanu enane siknga dakane kopbuyak komune gata kaaut aminu dongu buyambam siknga papi iat gatake kuking. Siwan gata yamandet aminu sangana gae moo gamukingu payamukuyak. Pake ga Anutu, Buyambamtapa yuayak kapaninu tawanu waandakane yutnangge natake tasikuyak.

¹⁹Ninda Buyambam tapatane umana yatangenatnim. Tapdukbamu yuamangu ita nindane meyaninu pakotnake panggak. Ngan, Anututa ninu gatuna papan take yutnim.

²⁰Nisane Anutuninu waapata gatanimuwawan ninu take yuamang. Anutu, Buyambam tapaninu nindane toiknginda, unzing gatanimuke nin papan ninda dua kumnim.

²¹Siakan siknga, Anututa iwana gatukande pasiwan maining. Dasingge, waaminu waiaknga asinggan tawake tasikaing.

²²Sike Buyambam tapata anzing yanggak, “Gindane iwanza Basan kep komune pakapu yuaingu unenana dua. Sike apmea gindane iwanza yanipakapit. Sike yanggabam gwekatang ama kutakngine siknga ba yuaingu, wa unzing, keu maa siknga komune datakuke yuaing binga, wa nata apme pakapit.

²³Siwan ginda iwanza kumzang siknga zipmake kepisata daknga yaiyuk kamunzata iwanzatane daknga takekan ingwamuke naning.”