Psalms 68:3-23

³Machane pi’in bmat’aw e ba felan’rad ni yad be felfelan’ u p’eowchen Got; yad be tolulnag e felfelan’.

⁴Mu tang niged Got, mon’ed e tang ni gimed be pining e sorok nga fithngan; mu fal’egned e kanawo rok e en ma yan u daken e manileng, fithngan e cha’nem e SOMOL— ngan felfelan’ u p’eowchen!

⁵I Got, nma par u lane Tempel rok nib thothup, e ma ayweg e pi’in kanim’ rorad mma yoror rok e pi’in ke yim’ figirngirad.

⁶Ma pi’ e tabnaw ko pi’in dakuriy be’ rorad, ma chuweg e girdi’ u kalbus miyad felan’ ni ka ni pagrad, ma pi tatogopluw e bay ra pired u lan bbinaw ni kann’ag.

⁷A Got, nap’an ni mu pow’iy e girdi’ rom, ngam marod ngam th’abed e ted ni desert,

⁸me rur e fayleng, me map e n’uw u lang nga but’, ni bochan e wub rok Got nu Sinai, ni aram e wub ko fare Got nu Israel.

⁹Got, gur e ka mu k’aring e n’uw nib gel ni nge aw, ya nge sul e but’ rom nike kireb nga rogon;

¹⁰girdi’ rom e kar fal’egned taferad u rom; fanam gol mag pi’ e tin ba t’uf rok e pi gafgow ngorad.

¹¹I Somol e yog e n’en ni ngan rin’, ma bo’or e ppin nra welyed i yan:

¹²“Pilung nge salthaw rorad e ra milgad!” Ma ppin ni bay u tabnaw e ra f’oded rorad e tin ni kol ko mael;

¹³bogi ya’an e dove ni kan ing ko silber, ni be galgal ram’en porad ko gol. (Mang ni par boch i gimed u to’oben e chumol ko saf e rofen ni un mael?)

¹⁴Nap’an ni wereg Got ni Gubin ma Rayag Rok fapi pilung u daken e Burey ni Zalmon, me gagiyegnag nge aw e ayis u rom.

¹⁵Rib th’ab feni gel e burey ni Bashan, fare burey ni bo’or p’ebugul!

¹⁶Burey ni yo’or p’ebugul mang ni ga be thinthin’an ko fare burey nike mel’eg Got ni nge par riy ndariy n’umngin nap’an.

¹⁷Ma yib Somol u Sinai nge yan ngalan fa gin nib thothup, nike un ngak yu biyu’ i chariot rok.

¹⁸Me yan ngalang ko gin nth’abi tolang, nike fek e pi’in ni kolrad me pi’ e pi tatogopluw e tow’ath ngak, I SOMOL ni Got e ra par u rom.

¹⁹Ngan pining e sorok ngak SOMOL, nma fek e gilab rodad u reb e rran ngu reb; ir fare Got ni ta’ayuw rodad.

²⁰Got rodad e ba Got nma thapegey; ir e SOMOL, ni Somol rodad, nma lagdad ko yam’.

²¹Got e rra bilig lolugen e pi to’ogor rok, ni pi’in darir paged wo’rad ni kireb.

²²Ke ga’ar Somol, “Bay gu fulweg e pi to’ogor rom u Bashan; Bay gu fulwegrad u t’ay e rigur,

²³ya nge yag nim marod u fithik’ e racha’ rorad, me lil’ e pilis romed urngin e racha’ ni yad ba’adag.”