Osee 6

1

2

3

4

5

6

7

8

9

10

11

12

13

14

¹Isirelibɑ bɑ sɔ̃ɔnɑ bɑ nɛɛ, i nɑ su gɔsirɑ Yinni Gusunɔn mi. Wee u sun so u mɛɛrɑ kuɑ. Adɑmɑ u koo bɛsɛn mɛɛrɑ ye nɔɔri u sun bɛkiɑ.

²N ǹ mɑɑ tɛɛmɔ u kɑ sun wɑ̃ɑru wɛ̃, kpɑ sɑ n wɑ̃ɑ win wuswɑɑɔ.

³I de su kɑsu su nùn giɑ. Nge mɛ sɑ rɑ n yɛ̃ kɑm kɑm mɑ sɔ̃ɔ u koo yɑri, nge mɛyɑ sɑ n mɑɑ yɛ̃ mɑ u koo nɑ. U koo nɑwɑ nge tom buruku gurɑ ye yɑ rɑ tem yɛmiɑsie.

⁴Yinni Gusunɔ u nɛɛ, bɛɛ Yudɑbɑ kɑ Isirelibɑ, mbɑ kon bɛɛ kuɑ. Wee bɛɛn kĩru nɛn sɔ̃ tɑ sɑ̃ɑwɑ nge bururun kɑkoru ǹ kun mɛ nge dirum mɛ mu rɑ yɑrinɛ fuuku.

⁵Yen sɔ̃nɑ kon bɛɛ nɛn sɔmɔbu gɔriɑmɑ bu bɛɛ sɔ̃ mɑ kon bɛɛ sɛɛyɑsiɑ. Kpɑ bu mɑɑ bɛɛ sɔ̃ mɑ kon bɛɛ go. Nɛn siribu bu koo sɔ̃ɔsirɑ nge yɑm bururɑm.

⁶Domi wɔnwɔndɑ nɑ kĩ, n ǹ mɔ yɑ̃kuru. Mɛyɑ nɑ mɑɑ kĩ nɛn tɔmbu bu mɑn giɑ n kere bu mɑn yɑ̃ku dɔ̃ɔ mwɑɑrɑruginu kuɑ.

⁷Bɑ nɛn ɑrukɑwɑni kusiɑ nge mɛ tɔmbu bɑ rɑ n kuɑnɑmmɛ. Wee bɑ mɑn tɔnu kɑndu kuɑ.

⁸Gɑlɑdigibu bɑ sɑ̃ɑwɑ tɔn kɔ̃sobu mɑ bɑ yɛm yɑri bɑɑmɑ.

⁹Nge mɛ swɑɑ diobu bɑ rɑ n swɑɑ mɑrɑ, nge mɛyɑ yɑ̃ku kowobun wuuru tɑ wɑ̃ɑ Sikɛmun swɑɑɔ tɑ tɔmbu goomɔ.

¹⁰Nɑ gɑ̃ɑ kɔ̃sunu wɑ Isireliɔ, niyɑ bɑ bũnu gɑsirimɔ, bɑ tii disi dokemɔ nge sɑkɑrɑ kowo.

¹¹Sɑɑ yɑ sisi yè sɔɔ kon mɑɑ bɛɛ Yudɑbɑ sɛɛyɑsiɑ. Yinni Gusunɔ u nɛɛ, sɑnɑm mɛ nɑ kĩ nɛn tɔmbu Isirelibɑ bu wurɑmɑ yorun di,