Osee 8

1

2

3

4

5

6

7

8

9

10

11

12

13

14

¹Yinni Gusunɔ u nɛɛ, i kɔbɑ soowo. Wee yibɛrɛbɑ bɑ nɛn sɑ̃ɑ yeru wuusimɑ nge kɑsi. Domi Isirelibɑ bɑ nɛn ɑrukɑwɑni kusiɑ. Mɑ bɑ nɛn sɔ̃ɔsiru yinɑ.

²Bɑ koo mɑn nɔɔgiru suemɑ bu nɛɛ, bɑ nɛ ben Yinni yɛ̃.

³Adɑmɑ bɑ geɑ deri, mɑ yibɛrɛbɑ bɑ koo bu nɑɑ swĩi.

⁴Bɑ tii sinɑmbu kuɑ bɑ ǹ mɑn sɑɑwɑrɑ kue. Mɑ bɑ bũnu sekɑ kɑ sii geesu kɑ wurɑ. Yen sɔ̃nɑ bɑ koo kɑm ko.

⁵Bɛɛ Sɑmɑrigibu, nɑ bɛɛn nɑɑ wurɑgiɑ ye tusɑ. Nɑ mɑɑ kɑ bɛɛ mɔru mɔ̀. Sɑɑ yerɑ̀ i ko i sinɑ bɑ ku n bɛɛ tɑɑrɛ wɛ̃.

⁶Wi u bwɑ̃ɑrokunun sɔmburu yɛ̃ Isirelibɑ sɔɔ wiyɑ u nɑɑ wurɑgiɑ ye kuɑ. Yɑ ǹ sɑ̃ɑ Gusunɔ. Yen sɔ̃nɑ bɑ koo ye kɔsuku muku muku.

⁷Wee i woo duurɑ, yen sɔ̃nɑ i ko i woo bɔkɔ gɛ̃. Mɔndu gɑrɑ nɛɛ, dobi bɛm sɑri ku rɑ n som mɔ. I n mɑɑ yɛ̃ mɑ bɛɛn gbeɑn dĩɑnu nù n dɑɑ geɑ kuɑ, sɔbɑ bɑ koo nu gurɑ.

⁸Isirelibɑ bɑ derɑ bɑ bu mwɛ. Be wee bwesenu sɔɔ nge weke te goo kun mɑɑ kĩ.

⁹Domi bɑ dɑ Asiriɔ nge gbeeku kɛtɛku ge gɑ tii kpɑre. Bɑ dɑ bɑ somiru kɑsu mi.

¹⁰Bɑ bwese tukunu gobi kɔsiɑ bɑ n kɑ nɔɔ tiɑ sɑ̃ɑ. Adɑmɑ kɑ mɛ, kon bu mɛnnɑ, kpɑ Asirin sinɑ boko u bu yoo sɔmɑ koosiɑ.

¹¹Isirelibɑ bɑ bũu turɑnu kuɑ nu dɑbi. Niyɑ nu derɑ bɑ durum mɔ̀.

¹²Bɑɑ nɑ̀ n bu nɛn woodɑbɑ yoruɑ sere kɑ yen gɑri piiminɔ, bɑ rɑ ye gɑrisiwɑ nge ye yɑ wee tɔn tukon min di.

¹³Bɑ rɑ yɛɛ go bu kɑ mɑn yɑ̃kuru kuɑ, kpɑ bu yin yɑɑ tem. Adɑmɑ ben yɑ̃ku ni, nu ǹ mɑn doremɔ. Nɑ ǹ ben torɑnu duɑri. Kon bu sɛɛyɑsiɑ. Yen sɔ̃nɑ bɑ koo gɔsirɑ bu dɑ Egibitiɔ.

¹⁴Isirelibɑ bɑ tii sinɑ kpɑɑru bɑniɑ. Mɑ bɑ nɛ ben tɑkɑ kowo duɑri. Yudɑbɑ bɑ mɑɑ ben wuu dɑbinu gbɑ̃rɑru toosi. Adɑmɑ kon ben wusu dɔ̃ɔ sɔkiri kpɑ u ben dii geenu di.