1Mibitiyara is menge Israilihanen he ke sikandan te, “Kuwa kew en, su edlikù kiw en diyà te Nengazen. Iyan sikandin midezaat kenitew ne iyan daan sikandin edtavang kenitew.
2Egkeiring kiw te minatey he segugunà ed-uyaǥen. Te kenà egkeuǥet ne ibpeenew kiw zin, ne ebpengungubpaan kiw ziyà te etuvangan din.
3Ebpeninguhaan tew he mekilala tew is Nengazen. Siguradu he ebpekeuma sikandin iring te kedsilà te andew. Ebpekeuma sikandin iring te uzan he ebpekeveǥey te wahig diyà te tanà.”
4Piru migkaǥi is Nengazen te, “Menge etew te Israel wey Juda, hengkey is ebeelan ku ziyà te keniyu? Is kebmahala niw kedì ne meǥaan dà egkaawà; iring dà heini te edsaǥad he virisbiris etawa zehemug emun meselem.
5Umbe, ebpetizeenan ku sikiyu pinaaǥi te menge ebpeneuven ku he ebpemematey kew. Ibpezayag ku is kedhukum ku he iring kerayag te kilat.
6Su kenè ku iyan egkesuatan is menge pemuhat niw, kekenà, iyan is kebmahala niw kedì. Igkesuat ku pa is kegkilelaa niw kedì kenà is kebpemuhat niw te menge pemuhat he edtutungen.
7Iring ki Adan, wazè niw itetepi-an is paaǥi ku te kebpekid-uyun keniyu. Midluivan a keniyu keniyan te lugar niw.
8Is inged he Gilead mid-ubpaan te lalung he menge etew ragkes en is menge teremunù.
9Is menge memumuhat niw henduen be te grupu te menge tulisan he ebantey zà te egkebiktima zan. Ebpenhimatey sikandan diyà te zalan he ibpehendiyà te Shekem, wey zuen pa zuma he mekeeled-eled he menge vaal he mibeelan dan.
10He menge tig-Israel, utew grabi is neehè ku ziyà te keniyu; ed-azap kew te zuma he menge ed-ezapen, umbe nehimu kew he meremerik.
11Minsan sikiyu is menge tig-Juda netelaan en is kedsiluti keniyu. “Egkesuat a pezem he idlikù ku is meupiya he kebpekesavuk te menge etew ku.
