Hosea 6

1

2

3

4

5

6

7

8

9

10

11

12

13

14

¹“Ajoc, nâŋâc Wofuŋtao risienaŋ, eki hâcne kisuc qâsuc‐nâpoweczi mocwâc bâpiaŋ‐nâpoocmu, e nâpoweczi mocwâc ʒure foŋ enâreocmu.

²E ʒoaŋ jajahec tarame ɋiɋicne bacnâpoocmu, ʒoaŋ jahec â moc eha bafaharec‐nâpome ere maio junʒepeneŋ.

³Nâŋâc mana taranʒepeneŋ, Wofuŋ mana taranaŋte henʒiriŋnenʒepeneŋ. E furic qânikiŋ iŋucne fua‐jâmbâŋkeocmu e hoe sâko iŋucne fai‐nâŋecko wahaocmu, qa roro dameŋ maickezo eha hoe fisirâ mâreŋ bâgunuckeekac irec sâc fisi‐nâreocmu.”

⁴O Eferaim, go weniŋuc egarezepac, â Juda, go wâc weniŋuc egarezepac? Maŋjauŋ‐ŋeŋic i furic barâ omaeekac iŋucne, â titikuczi waharâ furictea kereŋkeekac irec sâc.

⁵No irec hâcne porofete jaŋe doc enarehapie henʒaŋ qanʒaŋ‐jopaekopac, â micdâŋ‐nanezi qâhâmoc‐jopaekopac; ehame bâbâtiŋ‐nanezi i tatamac iŋucne fuazejec.

⁶No taha bâzire mâcne, maŋjauŋte enareekac, qowi bâzi ririkere mâcne, Anutu no mana taracnuniŋte enareekac hâcne.

⁷Jaŋe Adam haeo ʒâʒâfic‐nane hetâcnembiŋ, ehuc ira hâcne râpecnumbiŋ.

⁸Gileade hae i ŋic sindaŋne jaŋere hae, soczi bâbie‐fârekicne.

⁹Fiuc roro jaŋe hatao ŋic meo fârec ejareeŋgopieŋ, irec sâc jaha taha bapa jaŋe eeŋgopieŋ, ehuc Sikem haere hatao ŋic qâhâmoc‐jopaeŋgopieŋ, jaŋe jâmbomac wiac hehesicne ebac eeŋgopieŋ.

¹⁰No Israe tiri ufuŋko wiac mamakâcne honeekopac, ira Eferaimzi qâpuc wiac dapecneekac, â Israezi wâwânâŋ sâko bâfuaekac.

¹¹O Juda, gore qa roro dameŋ i bakicne fokac wâc.