Osee 1

1

2

3

4

5

6

7

8

9

10

11

12

13

14

¹Sɑnɑm mɛ sinɑm beni Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑn temɔ, kɑ sɑɑ ye Yeroboɑmu Yoɑsin bii u bɑndu dii Isirelin temɔ, sɑnɑm mɛyɑ Yinni Gusunɔ u kɑ Osee Berin bii gɑri kuɑ.

²Gɑri yi Yinni Gusunɔ u gbiɑ u Osee sɔ̃ɔwɑ yi wee. U nɛɛ, Osee, ɑ doo ɑ kurɔ suɑ wi u rɑ sɑkɑrɑru ko. Bɛɛn bibu bɑ koo mɑɑ win yirɑ swĩi. Domi Isirelibɑ bɑ bũnu gɑsirimɔ bɑ sɑ̃ɑmɔ nge kurɔ sɑkɑrɑ wi u durɔbu gɑsirimɔ. Mɑ bɑ nɛ, Yinni Gusunɔ deri.

³Mɑ Osee u seewɑ u Gomɛɛ Dibilɑimun bii suɑ kurɔ. Yerɑ u kɑ nùn mɛnnɑ. Mɑ kurɔ wi, u gurɑ suɑ u nùn bii tɔn durɔ mɑruɑ.

⁴Mɑ Yinni Gusunɔ u nɛɛ, i bii wi yĩsiru kɛ̃ɛyɔ Yisirɛɛli. Domi sɑɑ fiiko sɔɔ kon Yehun yɛnugibu wɔri yèn sɔ̃ bɑ tɔmbun yɛm yɑri Yisirɛɛliɔ, kpɑ n Isirelibɑn bɑndu kpeerɑsiɑ.

⁵Tɔ̃ɔ te sɔɔ, kon Isirelibɑn tɑbu durɔbun tɛnnu bɔɔku Yisirɛɛlin wɔwɑɔ.

⁶Yenibɑn biru, Gomɛɛ u mɑɑ gurɑ suɑ mɑ u bii tɔn kurɔ mɑrɑ. Mɑ Yinni Gusunɔ u Osee sɔ̃ɔwɑ u nɛɛ, ɑ nùn yĩsiru kɛ̃ɛyɔ Lo Ruhɑmɑ. Yen tubusiɑnɑ bii wi bɑ yinɑ. Domi nɑ ǹ mɑɑ Isirelibɑ wɔnwɔndu kuɑmmɛ. Nɑ ǹ bu suuru kuɑmmɛ.

⁷Adɑmɑ kon Yudɑbɑ wɔnwɔndu kuɑ, kpɑ nɛn tii n bu fɑɑbɑ ko nɛ wi nɑ sɑ̃ɑ Gusunɔ ben Yinni. Adɑmɑ n ǹ mɔ kon kɑ ben yibɛrɛbɑ tɑbu ko. Nɑ ǹ tɛndu dendimɔ ǹ kun mɛ tɑkobi ǹ kun mɛ dumi kɑ yin mɑɑsɔbu.

⁸Yenibɑn biru, Gomɛɛ u bii wi bom kɑrɑ. Mɑ u wure u gurɑ suɑ u bii tɔn durɔ mɑrɑ.

⁹Mɑ Yinni Gusunɔ u nɛɛ, ɑ nùn yĩsiru kɛ̃ɛyɔ Lo Ami. Yen tubusiɑnɑ n ǹ nɛn tɔmbu. Domi i ǹ mɑɑ sɑ̃ɑ nɛn tɔmbu, nɑ ǹ mɑɑ sɑ̃ɑ bɛɛn Yinni.