1Yuusufu khumwiinamela papaawe omaasho wawe khumpejari khusala alila.
2Elottelanaka khuwooza anamajisa thiipa awe yoori anvaaze thiipa ya paalasamu papaawe yoori ahivutte; yo khuretta etthiipo.
3Ottukuntteliwa thiipa Ezirayeele weeshiye siikhu arupayiini, nkhama etthiipo aazowereliyeezo Amisuri. Yo eeshiye siikhu saapiini ari mmatthaka.
4Nawiisha matthaka apale, Yuusufu khuwooza attunkhulu apale aari wiikhalanaaye Firawuuna araka: “Kookholani moolu mwilawe mwamuuze Firawuuna yoori;
5Paapa ahinafwe, aakilaphisiye yoori: ‘N'oofwa kilawe kanzikhe attaapho azikheweevo ajamaaze tuniya ya Kanaani.’ Safwatali mwikilikhe kilawe kanzikhe ottuukho nawiisha kintta ota.”
6Firawuuna khunjipu araka: “Wiiya oolaphisiye etta wanzikhe papaawo.”
7Aphano Yuusufu khulankha khusala alawa onzikha papaawe vamote na attunkhulu, akarumeya ooshi a Firawuuna na mamunu-munu ooshi a tuniya ya Misuri.
8Aalawiye vamote na ajamaaze Yuusufu na attwiize, na ajaama ooshi a Yaakhumpa aasaliiyeeyo aari asimaana na pwittipwitthi na mompe.
9Atthu aalawiye mmwikukutta akina vakhavalo, atthu aalawiyeeyo aari a waatta.
10Afiiyeevo nti wa Ataati oriiye phantte ya malawa-njuwa ya muuttho Yorotaani, khwiikhala siikhu sapa Yuusufu ari mmatthaka wa papaawe eettaka olila.
11Wakathi Akanaani apale aari wiikhalaaye ottuukhule awooniyeevo Amisuri apale eettaka olila nti wa Ataati yo khuri: “Olila opu anlilaaye Amisuri apa nwulweene.” Pi apho khutthaja nzina aphale vaya la Apeele-Misurayiila, eniiyaaye malawa-njuwa ya muuttho Yorotaani.
12Aana a Yaakhumpa khuretta etthiipile aawooziyeezo ahinafwe.
13Khunthuula khunlawana tuniya ya Kanaani khulawa khunzikha nlikurakuza la Makhipeela waattamana na Manre, nshapa nttintthile Eburahiima oozanyaniyeeyo Eforoni Nhiiti yoori asala awaazikhawo ajamaaze.
14Nawiisha ozikha, Yuusufu khurutela Misuri vamote na attwiize na atthu ooshi apale aalawaniyeeyo ozikha.
15N'oofwa papaaya, attwiize Yuusufu khuri: “Talili Yuusufu khana liphuta varoho vawe mwaasa wa vitthu epile nanretteliyeezo zootakhala, na-ye khanteela onirettela etthiipo?”
16Attwiize khumperekheza nhupi Yuusufu yoori: “Papaawo ahinafwe aanirumiye
17yoori niwuuze toono: ‘Safwatali, owaaswaamihi attwiizo khwa koosa na twampi epile ooretteliyeezo mwaasa woohuukholi saana.’ Apho nasaapi eti ninuuvekela yoori, oniswaamihi koosa zetthu, fweeyo niiyiye akarumeya a Nluku otu aari omwaaputwaaye papaawo.” Ye n'oosiila mattakhuzi apale khusala alila.
18Aphano khuta attwiize khwiinama khukokhora anvekelaka nswammaha araka: “Nata n'aamwiitthwaana awo.”
19Yuusufu khuwooza yoori: “Wala mwihikoove. Miiyo aki Nluku.
20Khweele mweeyo mwaakiwazeliye shawuri zootakhala. Ila Nluku khuzukulisa khwiiya zooshapweya. Khwa toowo Nluku awoosuru atthu a waatta mpakha leelo eti.
21Apho mwihoove. Miiyo kintta wuukholani mweeyo na aaneenu.” Khwa etthiipo Yuusufu khuwaanyamaza attwiize, mattakhuzi apale aawooziyeeyo aawaafiiye nroho mwaya.
22Yuusufu aari wiikhala Misuri vamote na ajaama a papaawe, ye eekhaliye nyaakha miiya na khumi.
23Khuwoona aana a Efwarayiimu peewu yattaatthu, theenya khuwaathuula aana a Makhiiri, mwaana wa Manaase, khuwaattha vamoolu vawe.
24Yuusufu ahinafwe khuwooza attwiize yoori: “Apha miiyo kinttela ofwa, ila Nluku onteela owaawunini oolazenimo mmuti mphu oolawaneni tuniya etile aamwaahitiyeeyo alaphaka yoori onteela omwinkha Eburahiima, Esiyaakha na Yaakhumpa.”
25Ye khuwaalaphisa aana a Ezirayeele araka: “Kiniwuuzani khweele, Nluku onteela owaawunini. Amana zirettikhana epo zaya, mwilawaka nti aya opo mwithuule makhonkolo aka.”
26Yuusufu afwa arina nyaakha miiya na khumi. Khuvaaziwa thiipa ya paalasamu mwiili awe yoori ahivutte, khutthiiwa mwiiluza khuzikhiwa tuniya ya Misuri.
