Mwanzo 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Esiyaakha ooluvaliye, maasho awe aashokheriye khuhisala oona. Khunkhuwela Ezawu mwanawe otu nwulu araka “Mwanaka!” Ye khujipu: “Lape!”

²Khumuuza yoori: “Miiyo kooluvala siikhu kimfwaavo khijuweyeeni.

³Othuule nttetthe lawo olawe ntthuttu wasaye nyama.

⁴Wiipikhe saana wookituvelavo okitiisele kije, kuuparikhiye kihinafwe.”

⁵Ezawu khulankha khulawa ntthuttu osaya nyama yoori antiisele papaawe. Rapekha aari onsiila Esiyaakha attakhulanaka mwanawe Ezawu,

⁶ye khumuuza mwanawe Yaakhumpa araka: “Weyo! Kansiila papaawo amuuzaka ttwiiyo Ezawu yoori:

⁷‘Okitiisele nyama ya wiipikhiwa wookituvelavo kije, kuuparikheye mmakhono wa Nnyizinku kihinafwe.’

⁸Mwanaka, osiileze mattakhuzi apa kinuurumaaye, nasaapi eti

⁹olawe oliphanko la nyama wa waathuule aana a puuzi awiri ooneneva, kite kiweepikhe saaneene anttelaaye ontuvela papaawo.

¹⁰Onlawanele aje, ooparikhiye ahinafwe.”

¹¹Yaakhumpa khunjipu mamaawe Rapekha yoori: “Ezawu ti wa waattana ovuzi, miiyo akina.

¹²Paapa amana akipapasela ahikisikanani ovuzi kinttela wiiya ntthu woohata, toowo khankiparikhiya ontta okilaani.”

¹³Mamaawe khumuuza yoori: “Laana yaya eto ti ekikwele miiyo mwanaka. Ila orette eti kiwuuziyeeyo: weettele puuzi epile kuurumiyeezo.”

¹⁴Ye khulawa khuthuula puuzi khuntiisela mamaawe, khwiipikha wootuvavo waari weettelaaye ontuvela papaawe.

¹⁵Aphano Rapekha khuthuula kuwo epile zooshapweya za Ezawu mwanawe otule nwulu zaari owawe, khunwalisa Yaakhumpa mwaana otu nttiitthi aya.

¹⁶Khumfinikha na shapala ya puuzi makhono awe na phantte ya mmwisiko mwawe wahaariimo ovuzi.

¹⁷Khuthuula etthu-yooja yootuva etile eepikhiyeeyo na phaawu khumwinkha mwanawe Yaakhumpa.

¹⁸Ye khulawana aphale aariivo papaawe khunkhuwela: “Paapa!” Ye khujipu: “Lape! Weeyo o mwanaka-ni?”

¹⁹Yaakhumpa khunjipu papaawe: “Miiyo ki Ezawu mwanenu wa mwanzo. Katiisa eti mwaakirumiyeeyo. Mwilankhe mwije nyama eti kitiisiyeeyo, nawiisha mwikiparikhiye.”

²⁰Esiyaakha khumuuzela mwanawe yoori: “Wapattha toovi nasaapiru mwanaka?” Ye khujipu: “Nnyizinku Nluku eenu eetta okiperekheza.”

²¹Khumuuza yoori: “Nkakisusele apha kuupapasele, kuujuwe nkhama khweele o mwanaka Ezawu.”

²²Yaakhumpa khunsusela papaawe. Esiyaakha khusala ampapasela, khumuuza yoori: “Huula ti ya Yaakhumpa, ila makhono pa Ezawu.”

²³Ye khuhinjuwi mwaasa wa makhono awe wiiyana ovuzi nkhama apa a ttwiiye Ezawu.

²⁴Ahinamparikhiye khumuuzela theenya: “Mwanaka Ezawu ti weyeena?” Ye khujipu: “Aa, ti miyo.”

²⁵Aphano khuri: “Okitiisele apha nyama yaya eto osayiyeeyo kije, yoori kuuparikhiye.” Yaakhumpa khumweettisela khuja na khumwinkha viinyu khunywela.

²⁶Esiyaakha khumuuza yoori: “Okaattame mwanaka okipatikhe.”

²⁷Yaakhumpa khumwaattama papaawe khumpatikha. Esiyaakha khusiila muuru wa kuwo zawe, aphano ye khumparikhiya araka: “Muuru wa mwanaka muuru wa nshapa looparikhiyiwa ti Nnyizinku.

²⁸Nnyizinku awinkhe mmatte wa pinkuuni na oruwera wa vathi, peewu ya waatta na viinyu ya waatta.

²⁹Khapila za waatta zuurumeele weeyo, na mahimo a waatta ookokhorele. Wiiye mbwana wa attwiizo, na aana a mamaawo ookokhorele weeyo. Oolaanikha pi apale anttelaaye wuulaani, na ooparikhiyiwa pi apale anttelaaye wuuparikhiya.”

³⁰Paata Yaakhumpa oparikhiyiwa ti Esiyaakha papaawe, ye alaakavo aphale, nasaapiru ttwiiye Ezawu khufiya alankhaka wuusaya.

³¹Na-ye khwiipikha etthu-yooja yootuva khuntiisela papaawe, khumuuza yoori: “Mwilankhe paapa mwije nyama eti keetteliyeeyo osaya mwikiparikhiye.”

³²Papaawe khumuuzela: “Weeyo o paani?” Ye khuri: “Ti miyo Ezawu, mwanenu otu wa mwanzo.”

³³Esiyaakha khusuthuwa channu khusala athukumela khulupa yoori: “Khi otule apatthiyeeyo nyama khukitiisela ti paani? Miiyo kaja keesha weeyo ohinate. Kamparikhiya, ti wooparikhiyiwa!”

³⁴Ezawu n'oosiila mattakhuzi apale a papaawe khwiiphiiriwa khulila venkivene, khunvekela papaawe yoori: “Na-miyo paapa mwikiparikhiye!”

³⁵Ye khulupa yoori: “Aatiiyevo ttwiiyo apha khukittettekha, khuthuula parakha yawo.”

³⁶Ezawu khulupa yoori: “Eto swaafu yaphiiri akishinttaka. Ti maana ootthajiwa nzina la Yaakhumpa. Yamwanzo akinyakanya lifunku laka l'oomwaana wa mwanzo. Apho theenya akinyakanya parakha yaka. Paapa khamwinkiparikhiya na miiyo?”

³⁷Esiyaakha khujipu: “Miiyo kanthawaza Yaakhumpa yoori eeye mbwanaawo weeyo na ajamaazo ooshi anttela onrumeela ye. Onteela wiiyana tiriku ya waatta na viinyu. Kuurettele niini miiyo mwanaka?”

³⁸Ezawu khumuuzela papaawe: “Mweeyo paapa khamwisalaneeni hatha parakha? Na miiyo mwikiparikhiye!” Khusala alila anyakulaka.

³⁹Aphano Esiyaakha khunjipu: “Weeyo onttela wiikhala ohali woolepelana na miti zooruweriwa, ohali woothowawo mmatte wa pinkuuni.

⁴⁰Yoori weeyo opatthe meekhazi onttela wuumanana phanka yawo na onttela onrumeela ttwiiyo. Amana ojilipisa ontta olaamo nthwaapu mwaya mphu.”

⁴¹Ezawu khwiiya wa wiiphiiriwa ti ttwiiye mwaasa wa parakha etile enkhiweeyo ti papaawe. Khusala oopuwela toono: “Siikhu za matthaka a paapa ziri kharipu. Amana afwa miiyo kintta omuula ttwiiyaku Yaakhumpa.”

⁴²Wakathi asiiliyeevo Rapekha mattakhuzi apale aari ottakhulaaye mwanawe otu wa mwanzo Ezawu, ye khunkhuwela mwanawe Yaakhumpa otu nttiitthi aya khumuuza yoori: “shawuri ariinaazo Ezawu pi zootakha owuula.

⁴³Apho weeyo mwanaka osiile eti kiniwuuzaaye. Otthire nasaapi ethiiti, weette wa nlupwaaka Labani aniikhalaaye nti wa Harani.

⁴⁴Weekhale ottuukho mpakha ttwiiyo omwiishe okatipukha wawe.

⁴⁵Amana omwiishela okatipukha wawe na asahawu eti onretteliyeeyo miiyo kintta wuuperekheza nhupi yoori ote. Akintakha okipwetheya aanaaka oowiiri siikhu moote!”

⁴⁶Aphano Rapekha khulawa omuuza Esiyaakha yoori: “Akituveliweeni ohaayi aka wooshi mwaasa wa aakha a Ahiiti apa awaaraliyeeyo Ezawu. Amana Yaakhumpa na-ye awaarala aakha a tuniya ethiiti miiyo kinhithari ofwa.”