Miti Mânec 57:4-11

⁴No laioŋ, ŋic kisucke nâc ejareeŋgopieŋ, jaŋere ŋondeŋko fokopac; micsiec‐jeŋic i damu â tepe, nameŋ‐jeŋic ine sâqe mictara.

⁵Anutu, go fahare sambâŋ qâhuckerâ fezemec, eri tatamacgezi mâreŋ sâko mâreŋ sâckezejec.

⁶Jaŋe kike‐nanere bitiŋ râepie maŋnane wahawec; jaŋe hata‐naneo nombâŋ rombiŋ, erâ jaŋac ʒâziŋkerâ humbiŋ.

⁷O Anutu, maŋzi qiŋ herâ domakopac, maŋzi qiŋ herâ domakopac, no gae hehuc musi bape.

⁸Maŋ qâqâtâc‐nane, mana ɋâɋârec, kulele â gita, mana ɋâɋârec, no furic wiwickepe mana ɋâɋâreoc.

⁹O Wofuŋ, no qâpuc jaŋere ŋondeŋko daŋge gazape, no ŋicguru jaŋere ŋondeŋko mumbiaŋgupe.

¹⁰Aki anonocgezi feku sambâŋ heuakac, jauŋ fârigezi feku karoracko fisikac.

¹¹Anutu go fahare sambâŋ qâhuckerâ fezemec, eri tatamacgezi mâreŋ sâko mâreŋ sâckezejec.