Yaburina 57:4-11

⁴A n yabima nɛn keli ariyanna yi, a n nakisi. A ne mafalama nɛn naxanye n yɛngɛma. Bɛti xuini te. Alaa hinanna nun a lannayaan yitama n na nɛn.

⁵Yatane bata n nabilin, n saxi adamadi ɲaxine tagi. E ɲinne ligaxi nɛn alo tanbane nun xalimakunle. E lɛnne ligaxi nɛn alo silanfan xɛnxɛne.

⁶Ala, i ya binyen xa mayita kore xɔnna ma, a yi bɔxɔn nafe!

⁷E bata yalaan nati n yɛɛ ra n suxu xinla ma, e yi n nayagi. E bata yinla ge n yɛɛ ra, koni e tan yɛtɛɛn bata bira a kui.

⁸Ala, n xaxili ragidixi yati! N bɛtin bama nɛn, n yi i tantun!

⁹N xulunma nɛn sinma, n yi n ma bɔlɔnna nun kondenna maxa! N kurunma bɛtin bɛ nɛn subaxa!

¹⁰Marigina, n ni i tantunma nɛn siyane yɛ. N bɛtin bama i xa nɛn bɔnsɔnne tagi.

¹¹I ya hinanna gbo han ariyanna. I ya lannayaan texi han kore xɔnna.