Ola Saam 57:4-11

⁴Main enami olabat raidaran langa mi. Dei weidabat, redibala blanga kilim mi. Mi fil bradin na, laiga lilwan enimul im bradin wen im luk ola dinggo raidaran, en im luk olabat tang en olabat tuth.

⁵God, yu shoum yu haibala pawa deya ontop langa skai, en yu larram pipul luk yu brabli shainiwan lait ebriweya langa dijan wel. Yu shoum pipul ebriweya yu brabli haibalawan!

⁶Main enami olabat lukaranbat blanga mi. Mi brabli nogudbinji. Jis laik detlot men grajim bigwan hol wen dei wandi trepam enimul, wal lagijat na detlot men wandi trai trepam mi, bat dei garra oni trepam olabat ronselp. Dei garra jidan langa det trabul olabat selp.

⁷Ai garra kipgon trastimbat yu, God. Trubala, ai garra kipgon trastimbat yu. Ai garra sing en preisim yu!

⁸Mi dalimbat miselp, “Jidan gudbinji! Gajim yu gita en sing! Ai garra gidap bifo det san en sing!”

⁹Main Bos, ai garra gibit yu theingks lida langa ola pipul. Ai garra preisim yu lida langa ola pipul brom ebri kantri.

¹⁰Yu filing blanga kipgon laigimbat pipul im jidan ebriweya, brom longwei ontop raitdan langa graun. Yu trubalawei gajimap det skai.

¹¹God, yu shoum yu haibala pawa deya ontop langa skai, en yu larram pipul luk yu brabli shainiwan lait ebriweya langa dijan wel. Yu shoum pipul ebriweya yu brabli haibalawan!