Miti Mânec 55:1-14

¹O Anutu, go nunumu‐nanere hazec râec, â wâwâsic dâŋnane mi wisecnec.

²Mana‐narehuc dâŋ okacne bârisie‐narec; ʒârâ hâriŋ‐nanezi siricnukac.

³Râsi owa‐jeŋicte â sindaŋŋic ʒika fânâŋ‐jeŋicte maŋnane hâhâŋkekac. Jaŋe ʒârâ ʒâpâ faio râecnuŋgopieŋ, â aaric mana‐narehuc qaisocnuŋgopieŋ.

⁴Maŋnanezi ʒâic serereŋ manakopac, â hâmocte hâhâwiczi sipiricnukac.

⁵Ɋarac ɋarac qahuc domakopac, bipic‐nane tarame gâgâmârâkopac.

⁶Ʒiŋuc mukopac: “Jei, hapâ iŋucne fakechec ezapo! Ine fururuc qahuc wiserâ raku biaŋnuzac.

⁷Jei, no taicko jâmbâŋ razapo, erâ mâreŋ tuhuo soŋkezapo.

⁸No ʒocnehec raku sâsâoc moc bâfuarâ hoe mâŋâŋ sâkore ira soŋkerâ ŋezapo.”

⁹O Wofuŋ, biri‐jeŋic hetâtiehuc dâŋjeŋic bâsifuckec. No hae sâkoo qaqac â rârâsi honekopac;

¹⁰ŋafe ʒoaŋ sâc haesac râreckehuc domaŋgopieŋ, â maŋnao eesifuc â kikisâ fokac.

¹¹Ŋondeŋnao sisipiric fua rakac, â nareŋ gareŋ toma‐ticnao fific guguriŋ â eeatuc i moc mi omaekac.

¹²Mumusoriŋ i râsi moczi mi enarekac, i sâcne desuezapo; pepecne eenare i jabane moczi mi ekac, i sâcne rârierâ soŋkezapo;

¹³mâcne, i goki enarekic, âgo qomâ‐nanezi, mâmâc juhuc hohonec eekopereczi;

¹⁴qâqâtec juhuc dâŋ mumac qamanac ejuperec, hombaŋko Anuture ufuŋko mâmâc fejuperec.