SALMOS 55:1-14

¹NoTeco Dios, techtlacaquili quema nimotlatlajtía ica ta. Amo ximotlati quema nimitztzajtzilía.

²Techtlacaquili huan technanquili, pampa tlahuel nimotequipachohua huan nichoca pampa nitlaijiyohuía.

³Nocualancaitacahua nechtzajtzilíaj chicahuac huan quinequij nechmictise. Tlahuel nechcualancaitaj huan ica nochi inincualancayo nechtepotztocatihualahuij para nechtzontlamiltise.

⁴Nelía nechcocohua noyolo pampa nechitzquía se hueyi majmajtli.

⁵Quena, tlahuel nimajmahui huan nihuihuipica.

⁶¡Cuali elisquía sintla nijpiyasquía noeltlapal quen quipiya se paloma para huelisquía nipatlantehuasquía huan nimosiyajquetzati!

⁷Quena, nicholosquía hasta nepa campa huactoc tlalme catli mopantíaj huejca huan nepa nimocahuasquía.

⁸Nimoisihuiltisquía para nicholos huan nimotlatis tlen nochi ni tlaijiyohuilistli catli hualajtoc nopani. Eltoc quen se hueyi ajacatl hualajtoc catli tlamitlasosolohua.

⁹Toteco, xiquintzontlamilti nocualancaitacahua. Xijchihua ma mocuapoloca inijuanti ininseltzitzi quema camanaltij. Na niquitztoc para nochi tlahuilanaj campa hueli ipan ni moaltepe.

¹⁰Tlayohua huan tonaya masque itztoque catli quiyahualojtinemij ni altepetl ipan itepa para quimocuitlahuise tlen tocualancaitacahua, inijuanti catli nica ehuani ininseltzitzi mohuilanaj se ica seyoc ipan ni altepetl.

¹¹Tlatlajco nopa altepetl quichihuaj miyac tlamantli catli amo cuali, huan amo onca tlatlepanitacayotl. Ipan tianquis huan campa hueli momictíaj, tlachtequij huan tlacajcayahuaj.

¹²Amo elqui se nocualancaitaca catli nechcajcayajqui, pampa sintla quej nopa eltosquía, huajca niquijiyohuijtosquía. O hueltosquía nimotlatis huan nicholos.

¹³Pero elqui se catli nemiyaya nohuaya, se catli nechyacanayaya huan catli nonelhuampox.

¹⁴Quena, elqui yaya catli sentic timopohuiliyayaj nopa tlamantli catli tijpixtoyaj ipan toyolo, huan yejyectzi timocamanalhuiyayaj quema san sejco tiyohuiyayaj ipan mochaj, Toteco Dios.