Pesalem 55:1-14

¹O Anôtô, ôkêŋ taŋam ŋoc mec ma ôsiŋ taôm êndêŋ ŋoc taŋiboa atom.

²Ôŋô aê ma ôjô aêŋoc biŋ. Aê gaeŋ oliŋ tauc ma gao toŋoc gêŋwapacgeŋ,

³kêtu ŋacjonêŋ ŋaonda ma kêtu lau, taŋ sêkac tauŋ su aŋga Anôtônê nêŋ ŋaôndu, gebe êsêac sêgôliŋ gêŋwapac kêpi aê ma sêkêŋ kisa aê ŋawaôboa.

⁴Ŋoc ŋalêlôm ŋatutuc ŋasec gêc ŋoc waŋlêlôm. Gêmacanô gêgôm aê katakê e gêjac ŋoc lênô auc.

⁵Katakê e katênêp to ôliclu gêbuc.

⁶Aê kasôm gebe “Ojae, balôsimagê ênêc aêmamaŋ gebe jalôp sa jaêc gêŋ tonec su najalêwaŋ tauc jamoa ŋoc ŋasawa teŋ.

⁷Oc jaêc baliŋgeŋ jana, jalêwaŋ tauc jaŋgôŋ ŋoc gamêŋ sawa tau.

⁸Oc jaêc jana ŋoc gamêŋ kêsiŋ teŋ gebe mu-gêbuc to gamêŋ-kêlaŋgaŋ ê aê tôŋ atom.”

⁹O Apômtau, onseŋ êsêac su ma ôwa êsêac nêŋ biŋ êŋgic gebe galic sêgôm gêŋ ŋaclai to sêkac tauŋ kêkôc aŋga malac.

¹⁰Êsêac sêgi malac kêtôm bêc to geleŋgeŋ sêsêlêŋ sêmoa ŋatuŋbôm ŋaô ma gêŋ keso to biŋwapac gêjam malac auc.

¹¹Ŋaclai sec gêjam gamêŋ auc. Ma sêkôniŋ lau to sêsau biŋdansaŋ aŋga malacluŋ.

¹²Ŋacjo embe êsu aê susu oc jaôc gêŋwapac tonaŋ. Embe ŋoc soŋo-soŋo êkiaŋ tau sa êndêŋ aê oc jasiŋ tauc ôkwi.

¹³Mago aôm, taŋ kôtôm aê naŋ, aôm ŋoc ŋac jabaŋ aê to ŋoc ŋac, ôlim andaŋ aêŋa gôgôm gêŋ tau.

¹⁴Aêagêcnêŋ biŋ gelom tau e ŋapep ma tawê toôndugeŋ dawiŋ tauŋ dadêŋ Anôtônê andu taja.