Iba Gana 55:1-14

¹Ngode Datagaliwabe-o í̠na i̱naga bi larogo hale habe. I̱na dugu bialu bi larogo hale naholenaga hale pai nahabe.

²Aiore i̱naga bi larogo baya hangu hale howa ladai bibe. Genda i̱ha ngagome i̱ni bope holene tiga birane hendedo.

³Waitigi bu karume i̱ mo ko holenaga bi hongo howaore lalu kagoni ndobe. Agali ko karu tigua i̱ bopeore hole kagola i̱naga bu miniha mo ko henego kogoni. Tigua keba timbuni haragome i̱ha genda dewaore mo wiaga.

⁴I̱ ti hondowa gi timbuni halu i̱ni miniha homolenenaga gi holene íbu ngagoni.

⁵I̱ ani giho kogola i̱naga tingini duru laragoni. Gi holene timbunime i̱ bope kagola kogoni ndobe.

⁶Anigo i̱na ogodagua laro, Ainde i̱ babagane halu polene ega aleore hoa ho kogoni. I̱ ogonibi kole i̱na yagalo yu pialu mini ibilo dindi mbiraha ha̱lo birule manda bidole.

⁷Yagalo yu pialu dindi kaundiaha wali agali mbira nahaga ngagoha puwa haabo hole manda bidole ndobe.

⁸Iba dalu puyaburu hongoheore ibiragola i̱ abale yagalalu puwa bira do ho kole.

⁹Anduane Homogo-o i̱na tanoha agali maru gungu bialu karia hendedogo í̠na tinaga bi larago mo luluya halu ti bo ereba hai habe.

¹⁰Mbiraga horombebi tigua tanonaga ege pabe bidagoria daligani puíbu bialu haga ka. Wali agali tano ogoniha bu karume mana ko dewa mo ko holene ngaru biaabo haga kagoni.

¹¹Tano ogoniha wali agali bu karume tini bagabaga bialu mbirale ngarubi mo ko haga ka. Hariga gebage ngagoriabi ngoai haga hamanibi wali agali bu karume mendeali kago bame bime bope haga bialu tinaga mbirale yu kago yamule mo hondo haga bialu ka.

¹²I̱ waitigi mbira kagome i̱hondo bi ko laede hayagua i̱na bi uruni lelo wahabehe ko. I̱ handabe manga haga kagome i̱ hondo oba halu mege biyagua i̱na ibu i̱ nahendelo bira do habehe kogoni.

¹³Ai ani ndo o biyaruni í̠na birigoni. Í̠ i̱naga nenegeore howa i̱la haabo haga kegoni ndobe. Iya haru haabo haga berebali ndobe.

¹⁴Bamba iyane haru mandagi ibagabu halu te bayaleru lalu wali agali maru heba Ngode Datagaliwabenaga anda biago heagoria mandagi haribagoni ndobe.