Miti Mânec 34:3-20

³Nohec mâmâc Wofuŋ musokanʒepeneŋ, babafic ehuc ʒâŋe‐ticne muafeckenʒepeneŋ.

⁴No Wofuŋ wira basac ecnepo sâc micnaneo rowec, ehuc hâhâwic‐nane qamase‐fârewec.

⁵Erao ʒâŋe fihuc firic qâric eniŋ, eme ʒâŋe mai‐ŋeŋic mimiʒu qâʒuʒu mi ezejec.

⁶Ŋic huacbucne ʒizi wirame Wofuŋzi manawec, ehuc ʒârâ ʒâpâ‐ticne jâoc rofârewec.

⁷Wofuŋ araŋ bacneeŋgopieŋ jaŋe aŋelo‐ticnezi heririŋ‐jeŋicko ju fofo ehuc batarac‐jopaekac.

⁸Oi, esâicke honerâ mananiŋ: Wofuŋ e buuruchec! Ŋic moczi ere dapeŋko soŋkeocmu ere manape ʒerine ekac.

⁹O mitiŋicfâc‐ticne, ŋoŋe Wofuŋ araŋ bacnenʒepieŋ; e araŋ bacneniŋmu jaŋe wiac moc mi basaniŋmu.

¹⁰Laioŋ motecne jaŋe nânâ wiacte hâmoeŋgopieŋ; â Wofuŋ wira basac ecneeŋgopieŋ, ŋic i jaŋe wiac biaŋne moc mi basaeŋgopieŋ.

¹¹O motecfâc‐mae, ware hazec râehapie no Wofuŋ araŋ babacne irec fuŋne ŋazape.

¹²Mo ŋic mozi dameŋ ʒora juocte manasukac, â ʒoaŋ bocjaha jufehuc wiac biaŋne nâ bac eocte ecnekac?

¹³Nameŋgezi sâqocne bazacte soŋaŋkezemec, â micbipicgezi eeatuc gie bazacte aka hecnezemec.

¹⁴Sâqocne râpeckerâ eehâmo gie bazemec; wama bâfuarâ irec hata bâjâpezemec.

¹⁵Wofuŋ e tiŋne jueŋgopieŋ jaŋeraopec ʒâŋe fiekac, â wira wâwâsic ecneeŋgopieŋ jaŋerao hazec râeekac.

¹⁶Wofuŋ e ʒâŋe mainezi sâqocne bapa maic‐jopaekac, ine ʒâŋe biŋe‐jeŋic mâreŋkonec bârârieocte.

¹⁷Tiŋne juju jaŋe kuku qapie Wofuŋzi manaekac, ehuc ʒârâ hâriŋ fua‐jareekac sâc jowac roekac.

¹⁸Wofuŋzi bu heheric ejareekac jaŋe qâtec‐jopaekac, â maŋjeŋic ima qakicne jaŋe bafic‐jopaekac.

¹⁹Tiŋne juju e ʒârâ hâriŋ bocjaha fuacneekac; Wofuŋzi ine wiac iŋucne sasawaonec bataraekac.

²⁰E me kikene sasawa hone maiŋ eekac, irec mocjaha mac moczi mi herickecneocmu.