Psalm 34:3-20

³Kom in wiyu fahkak pwengpeng lun LEUM GOD; Ac lela kut in tukeni kaksakin Inel!

⁴Ke nga pre nu sin LEUM GOD, El topukyu; El aksukosokyeyu liki sangeng luk nukewa.

⁵Mwet su keok elos nget nu sel ac enganak; Elos ac fah tiana supwarla insialos.

⁶Mwet munas elos pang nu sel, ac El topkolos. El molelosla liki mwe ongoiya lalos nukewa.

⁷Lipufan lun LEUM GOD karinganulos su akfulatyal Ac molelosla liki mwe fosrnga nu selos.

⁸Kom in sifacna akilenak lupan woiyen LEUM GOD. Insewowo elos su konauk misla in El.

⁹Akfulatye LEUM GOD, kowos mwet lal; Elos su aksol elos eis mwe enenu lalos nukewa.

¹⁰Finne lion, elos ac masrinsral ke wangin mongo nalos, A elos su akos LEUM GOD, ma wo elos enenu tia ku in wangin.

¹¹Fahsru, mwet fusr nutik, ac porongeyu, Ac nga ac fah luti kowos in akfulatye LEUM GOD.

¹²Ya kowos lungse engankin moul lowos? Ya kowos lungse moul paht ac engan?

¹³Na taran kowos liki kas fohkfok Ac kas kikiap.

¹⁴Forla liki ma koluk ac oru ma wo; Sang insiowos nufon in suk moul misla.

¹⁵Mutun LEUM GOD suiya mwet suwoswos, Ac sracl porongo tung lalos.

¹⁶A El lainulos su oru ma koluk, Ke ma inge elos fin misa, ac sa na in mulkinyukla elos.

¹⁷Ke mwet suwoswos elos pang nu sin LEUM GOD, El porongalos; El molelosla liki ongoiya lalos nukewa.

¹⁸LEUM GOD El apkuran nu selos su inse musalla, Ac El molelos su wanginla finsrak la.

¹⁹Mwet wo elos keok ke mwe ongoiya pus, Tusruktu LEUM GOD El molelos liki ma inge nukewa.

²⁰LEUM GOD El arulana karinganulos; Tia sokofanna sri kaclos fah kaptelik.