Samu 34:3-20

³Kamongo baa wakasa ingyuo karamo lao namba lamailyu dokona lamaiyuo banya kingi doko role pyao lakandamanale.

⁴Nambame Kamongo lao loma soo piso siyunu dokopa dokona isingi langiya. Nambana paka renge dupwana baame namba kiiramo neta nyiya.

⁵Koo keta palyaraminyi kararamidupwa baa kandalyuo kando rae mairami. Nakama isa nembenge dupwame dee laa nalu nao naraminyi kararami.

⁶Range nyisarami ingya nange dupwa baa nyisinya larami dokopa nyisingi. Baame nakamana randa epelyamo dupwana kyawa minyuo nyiso karamo.

⁷Kamongo banya pii rape rape lao minyingi dupwa iso karo banya aŋala dokome randa epelyamo dokopa kyawa minyuo karenge.

⁸Kamongo doko baa apa pyuo keyangelao emba range kotapala apiyakalepe lao nakanjo soo kandare. Kamongo baakando nyeparamo doko kyawa minyara panda doko nyilyamo doko rae maiyuo karenge.

⁹Banya wambu dupwa banya pii rape rape lao minyuo karena. Dopa pyuo karaminyi dupwa yano pipyamo dupwa nakama keta palira.

¹⁰Mena laene dupwa nenge yano pilyamo dokopa mee lopome kumungi. Dopa pingi dokona wambu banya pii warombo singi dupwa mende yano pyuo yangya nange.

¹¹Wanyane wambu nambana puu minyingi dupwa epo namba apa letepe lao sela ipupwa. Dokopa apa pyuo Kamongo ketae pyambuo kararami lao mana langiru.

¹²Emba raeme kumuo karapuli yaka lao suu pilipi daa? Emba karo yaku napala rae maiyuo kumalana suu pilipi daa?

¹³Doko ramo doko kyambo pii laa nalu nao napala mata kando lenge dupwa yama pyuo minyuo kaeyare.

¹⁴Koo dupwa mata maiyuo kaeyo keyange pipi. Mona kyuu lao singi renge dokona reoe lao yulu poraiyuo pipala koto nyere.

¹⁵Kamongome waso rolae pingi dupwa kandokondali pyuo kandaro karo nakamana mona rando lenge doko soo karenge.

¹⁶Dopa pipyamopape koo pyuo karenge dupwa baame kando epe nasepala mata maiyuo karenge. Renge doko nakama kumarami dokopa wambu dupwame kame soo kaena lao pingi.

¹⁷Akali rolae pingi dupwa Kamongo kyakale lenge doko sakaro karenge. Randa epelyamo dupwa baame kunjinyi nembo nyingi.

¹⁸Wambu baa rangena yulu dokona uki minyuo pelyasa dokona isa pwuamano lao sepala mona nembenge dupwa keta Kamongo doko repeta karenge. Dee keyange eparali dupwa isa pwuamo lao suu pilyaminyi dupwa baame minyalyingi.

¹⁹Akali keyange doko keta randa malu nyilyamopape Kamongo dokome baa nyisingi.

²⁰Kamongo baame akali keyange doko koo keta paa nana lao rapu pyuo kararamopa banya kuli dokona mendakipi koko pyaa nara.