Mithali 1:1-26

¹Mithali za Sulemani mwana wa Daudi, mfalme wa Israeli.

²Mithali hizi zinafundisha hekima na maarifa, kufundisha maneno ya busara,

³ili mpate maarifa kwa ajili ya kuishi kwa kutenda wema, haki na adili.

⁴Mithali hizi zinatoa hekima kwa wale ambao hawakufunzwa, na kuwapa vijana maarifa na hadhari.

⁵Watu wenye busara wasikie na kuongeza elimu yao na watu wenye ufahamu wapate mwongozo,

⁶kwa kuelewa mithali, misemo, vitendawili na maneno ya wenye busara.

⁷Hofu ya Yehova ni chanzo cha maarifa- wapumbavu hudharau hekima na nidhamu.

⁸Mwanangu, sikia fundisho la baba yako na wala usiziache kanuni za mama yako;

⁹zitakuwa kilemba cha neema katika kichwa chako na jebu zinazoning'inia kwenye shingo yako.

¹⁰Mwanangu wenye dhambi wakikushawishi katika dhambi zao, kataa kuwafuata.

¹¹Kama watasema, “haya tufuatae, tuvizie ili kufanya mauaji, tujifiche ili tuwashambulie watu wasio na hatia, pasipo sababu.

¹²Haya tuwameza wakiwa hai, kama kuzimu inavyowachukua wenye afya, na kuwa kama wale waangukao kwenye shimoni.

¹³Tutapata vitu vyote vya thamani; tutazijaza nyumba zetu vile tunavyoiba kwa wengine.

¹⁴Weka vitu vyako kwetu; tutakuwa na mfuko moja kwa pamoja.”

¹⁵Mwanangu, usitembee katika njia moja pamoja nao; usiruhusu mguu wako kugusa katika mapito yao;

¹⁶miguu ya hukimbilia mabaya na huharakisha kumwaga damu.

¹⁷Kwa kuwa haina maana kumtegea ndege mtego wakati ndege anaona.

¹⁸Watu hawa huvizia kujiua wenyewe—wanatega mtego kwa ajili yao wenyewe.

¹⁹Ndivyo zilivyo njia za kila ambaye hupata utajiri kwa udhalimu; mapato ya udhalimu huondoa uhai wa wenye utajiri.

²⁰Hekima inalia kwa sauti mtaani, inapaza sauti katika viwanja;

²¹katika mitaa inalia kwa sauti kuu, kwenye maingilio ya milango ya mji inasema

²²“Mpaka lini enyi wajinga mtapenda kuwa wajinga? Mpaka lini enyi wenye dhihaka mtapenda dhihaka, na hadi lini enyi wapumbavu, mtachukia maarifa?

²³Zingatia karipio langu; nitatoa mawazo yangu kwa ajili yenu; nitawafahamisha maneno yangu.

²⁴Nimeita, nanyi mkakataa kusikiliza; nimeunyosha mkono wangu, wala hakuna aliyezingatia.

²⁵Lakini mumedharau mafundisho yangu yote na wala hamkuzingatia maelekezo yangu.

²⁶Nitacheka katika taabu yenu, nitawadhihaki wakati wa kupatwa taabu-