Melkahka Kan 92:4-14

⁴Maing KAUN, wiepen nin limomwi manaman akan kin kansenamwahwihiehla; pwehki sapwellimomwi wiewia kan, I patohwan koulki ei peren.

⁵Maing KAUN, ia uwen lapalap en wiepen nin limomwi kan! Ia uwen loal en audepen kupwuromwien!

⁶Met iei mehkot me aramas pweipwei men sohte kak ese; aramas loalopwon sohte kak wehwehki:

⁷aramas suwed kak keirda duwehte dihpw, irail me kin wia me suwed kak paiamwahula; ahpw re pahn kamwomwomwala douluhl,

⁸pwehki komwi, Maing KAUN, me kaun lapalahpie kohkohlahte.

⁹Se patohwan ese me sapwellimomwi imwintihti kan pahn mehla, oh aramas suwed kan koaros pahn lohdi.

¹⁰Komw ketin kakehleiehda duwehte koupwul lawalo men; komw ketin kupwuramwahwihkinie peren mwuledek.

¹¹I patohwanehr en ei imwintihti kan ar lohdi oh rongehr en me suwed akan ar weriwer.

¹²Me pwung kan pahn pweida mwahu duwehte nih kan; re pahn keirda duwehte sidar en Lepanon kan.

¹³Re rasehng tuhke kan me poadidi nan tehnpas en KAUN-O, me kin pweida mwahu nan Tehnpas en atail Koht,

¹⁴me kin wah mwahu ni ar mahlahr oh kin mwomwen pwulopwulte oh kehlail ahnsou koaros.