Melkahka Kan 88:2-17

²Komw ketin karonge ei kapakap; komw ketin karonge ei likwer en pek sawas!

³Apwal ngeder lelohngieier I kereniongehr mehla.

⁴I rasehngehr aramas teikan koaros me nektehn mehla; ei kehl koaros sohrasangieier.

⁵I lekdeklahr rehn me melahr akan; I rasehngehr me kamakamalahr akan me wonohnehr nan arail sousou, irail kan me komw ketin melielahr douluhl, me solahr kak ale sawasaparail sang rehmwi.

⁶Komw ketin sikeniedilahng nan kepin ei sousou, nan pwoahr ehu me loal oh rotorot douluhl.

⁷Omwi engieng pahi me inenen toutou, oh I milahr pahn iloak en engieng wet.

⁸Komwi me ketin kadohwan sang ie kompoakepahi kan; komw ketin wiahkiniehla mehkot saut mwohn masarail kan. I seldier oh solahr kak pitla;

⁹pwoaren mesei kat luwetkilahr ei lokolok. Maing KAUN, I patohwan likilikweriong komwi rahn koaros oh kin kapahda pehi kat nan ei kapakap.

¹⁰Ia duwe, komw kin ketin wiahda manaman ong me melahr akan? Re kak mourda oh kapikapinga komwi?

¹¹Mie me kin koasoia sapwellimomwi limpoak poatopoat nan sousou de sapwellimomwi loalopwoat nan wasahn kamwomwomwala kan?

¹²Ia duwe, sapwellimomwi manaman akan kin sansal nan wasa rotoroto de sapwellimomwi kalahngan nan sapwen me manokonoklahr akan?

¹³Maing KAUN, I patohwan likweriong komwi pwe komwi en ketin sewese ie; nimenseng koaros I kin patohwan kapakapohng komwi.

¹⁴Maing KAUN, dahme komw ketin soingkiniehla? Dahme komw ketin sohpeikihwei sang ie?

¹⁵Sang ni ei tikitik, I kin alehdi lokolok laud oh kin kerenieng mehkihla; I patohwan weikengkilahr toutou en sapwellimomwi kalokolok kan.

¹⁶Sapwellimomwi engieng mwuledek kauweielahr; sapwellimomwi kalokolok kan nektehn kemeiehla.

¹⁷Erein rahn ehu pwon re kin kapikapil ie rasehng ahden lapake; re kin kapiliepene sang wasa koaros.