SALMOS 88:2-17

²Xinechtlacaquili quema nimomaijtohua huan quema nimitztzajtzilía,

³pampa nijmati nisiyajtoc ica nochi tlen ax cuali hasta nijmati ya nechca eltoc para nimiquis.

⁴Miyac quiijtohuaj para ya tlantinemi noyolis huan para ayoc nijpiya chicahualistli.

⁵Tlacame nechtlahuelcajtoque para ma nimiqui. Niitztoc queja se tlen ya mijqui ipan tlatehuijcayotl huan nochi quiilcahuaj intla itztoya. Huan eltoc queja ta tinechilcajqui huan ayoc tinechmocuitlahuía.

⁶Ta tinechtlalijtoc ipan nopa tlacoyoctli tlen más huejcatla campa onca tzintlayohuilotl tlen más yayahuic.

⁷Mocualancayo nechtlaijiyohuiltía chicahuac huan ajachica nechtlatzintlanhuetziltía más.

⁸Tijchijtoc para noteixmatcahua ma nechtlahuelcahuaca huan ma nechijiyaca. Eltoc queja niitztoc ipan se tlatzactli huan ax hueli niquisa.

⁹Ayoc hueli nitlachiya pampa tlahuel nimochoquilijtoc. Mojmostla nimitztlajtlanía motlapalehuil, huan nimomatlalana quema nimomaijtohua ica ta, TOTECO, para xinechtlasojtla.

¹⁰Pero nijmachilía para, quena, nimiquis nimantzi, huan ¿tlachque ipati elis para na nopa chicahualnescayotl tlen tijchihuas quema ya nimictoc? ¡Ax tleno! ¿Huelis nihuelis nimitzpaquilismacas quema ya nimictos?

¹¹Se mijcatzi tlen ya quitlalpachojtoque ax huelis tepohuilis para tijpiya hueyi teicnelili. Ax huelis tepohuilis para titemachtli.

¹²Nepa campa tzintlayohua ax huelise tepohuilise nopa huejhueyi chicahualnescayotl tlen tijchihua. Mijcatzitzi itztoque ipan se tlali campa ayoc tleno quiilnamiquij, huan ax huelis mitzilnamiquise para san ta tixitlahuac.

¹³Pero na nimitztzajtzilijtoc ta TOTECO, huan sesen ijnaloc nochi tlen niquijtohua quema nimomaijtohua ica ta ajsi hasta moixtla.

¹⁴TOTECO, ¿para tlen tijcocolía noyolis? ¿Para tlen tiquijcuenía moxayac huan titlachiya sejcoyoc?

¹⁵Na niitztoc ipan tlaijiyohuili huan cuesoli hasta quema noja niitztoya nitelpocatl. Majmajtli huan miquistli tlen ta tinechtitlanilijtoc nechtoquilijtinemi, huan ama ayoc nihueli más niquijiyohuía.

¹⁶Miyac huelta hualajtoc nopan na mohueyi cualancayo, huan nopa majmajtli tlen tinechtitlanilijtoc tlahuel nechtlaijiyohuiltía.

¹⁷Quena, nochi nopa tlamantli nechyahualojtoc queja atl.