Kap 88:2-17

²Bɨsitno nandaki. Aŋpulugoki do yaŋ tɨdosot,

³nido jɨgɨ morapmɨ nagon noman taŋ namɨŋakwa palɨ kɨmokdot.

⁴Amɨn dɨwarɨ da si kɨmot do aŋ, nak uŋun yombem. Tapmɨmno kɨsisi mudaŋ.

⁵Nepmaŋ degakwa amɨn kɨlɨ kɨmakgwit gat kɨsi ekwamaŋ. Amɨn da amɨn kɨnda aŋakba kɨlɨ kɨmakgɨt da kɨmakbi tamokon tosok, nak uŋun yombem. Amɨn wagɨlsi ɨŋtaŋ yomɨŋek saŋbeŋek dɨma paŋpulugokdɨsal uŋun yombem.

⁶Mabɨ gapma dubagɨsi kɨdagɨsikon kɨlɨ pɨgɨgɨm, da pɨlɨn tuksigwan egɨsat.

⁷Butjapgo da obɨsi abɨŋ nepgut. Tap ɨdap da yaŋ tamalɨgek wutjɨŋban tagɨm.

⁸Gak da yopbɨ notnoni da manji namgwit. Gak da nepbɨ nak amɨn yokwisi dagaŋapbo madepsi pasal namaŋ. Uŋun da tebai abɨdaŋakwa arɨpmɨ dɨma pulugaŋ kɨkeŋ.

⁹Nak jɨgɨ paŋapbo dabɨlno yokwi taŋakwan tagɨ dɨma sɨŋtosot. Ae gɨldarɨ gɨldarɨ kɨsitno paŋenagek gak da aŋpulugoki do bɨsit asat.

¹⁰Gak wasok tapmɨmɨ toŋ amɨn kɨmakbi paŋpulugok do aŋek asal, ma? Amɨn kɨlɨ kɨmakgwit da pɨdaŋek mango awɨkwaŋ, ma?

¹¹Ae kɨmakbi tamokon kɨlɨ pakgwit kabɨ da gak da but dasi galak taŋ nimɨsal yaŋ dɨ yoŋ bo dɨma? Si tasɨk togɨ tamokon da gak da kɨlanin tagɨsi asal yaŋ dɨ yoŋ bo dɨma?

¹²Pɨlɨn tuk tamogwan ekwaŋ amɨn da wasokgo tapmɨmɨ toŋ uŋun dɨ pɨndakgaŋ? Amɨn gak da kɨlɨ ɨŋtaŋ yomgul tamokon ekwaŋ uŋun da aŋpakgo kɨlegɨ dɨ pɨndakgaŋ? Uŋun dɨmasi!

¹³Yawe, nak gak da aŋpulugoki do yaŋ tɨdosot. Nak wɨsa dagokdo morap gak do bɨsit asat.

¹⁴Mani Yawe, nido manji namɨsal? Nido pasɨl namɨsal?

¹⁵Monjɨ bulagɨ egɨpgum bɨsapmon da wɨŋ abɨsok egɨsaron, jɨgɨ paŋek kɨlɨ uŋunjok kɨmotdɨsat. Gak da yo yokwisi pasol pasolɨsi aŋ namɨŋaki tapmɨmno mɨni asak.

¹⁶Yawe, butjapgo da wutjɨŋ namɨsak. Gak da obɨsi nɨgek obɨsi aŋupbal asal.

¹⁷Gɨldat kɨnda kaloŋ nak do yaŋ asal. Pakbi da ɨgek mɨktɨm morap kɨsi wutjɨsak, uŋun da tɨlak amɨn da nak aŋgwaseŋ.