Pisalem 88:2-17

²Hagalongo mai gi dagu dalodalo. Hagalongo mai gi dagu dangidangi i di hagamaamaa!

³Nia haingadaa e logowaahee guu tale mai gi di au, gei au gu hoohoo gaa made.

⁴Au guu hai gadoo be digau huogodoo ala i golo ala gu hoohoo gaa mmade, ogu mahi huogodoo la gu hagalee.

⁵Au guu hudu gi daha gi baahi digau mmade. Au guu hai gadoo be digau ala ne daaligi ala e mmoe i lodo nadau daalunga, go digau ala gu haga de langahia Kooe, ala gu deemee di kae nadau hagamaamaa mai i doo baahi.

⁶Goe guu hudu au gi lodo di tua o taalunga, gi lodo di luwa llala ge bouli dongoeho.

⁷Do hagawelewele mai gi di au la gu daamaha huoloo i ogu nua, gei au gu beehi gi lala nia beau o di hagawelewele deenei.

⁸Goe ne hai ogu ihoo hagaaloho gi diiagi au. Goe guu hai au gii hai di mee huaidu i baahi digaula. Au guu tai gi lodo gu deemee di ulu gi daha.

⁹Ogu golomada gu paagege idimaa au gu duadua. Meenei Dimaadua, nia laangi huogodoo gei au e gahigahi Goe, ge e daahi aga ogu lima gi di Goe e dalodalo.

¹⁰E hai behee? Goe e hai au mogobuna ang gi digau ala guu mmade? Digaula ga mouli aga ga hagaamu Goe?

¹¹Digau mmade ala i lodo nia daalunga le e helehelekai i di hai o do aloho waalooloo ang gi ginaadou, be e helehelekai i di hai o do manawa dahi ang gi ginaadou i lodo tenua o digau mmade?

¹²E hai behee, o mogobuna gu modongoohia i lodo di gowaa bouli, be go do dumaalia i lodo tenua o digau ala gu haga de langahia?

¹³Meenei Dimaadua, au e gahigahi Goe belee hagamaamaa au. Nia luada huogodoo gei au e dalodalo adu gi di Goe.

¹⁴Meenei Dimaadua, Goe guu hudu au gi daha beleiaha? Goe guu huli gi daha mo au beleiaha?

¹⁵Mai i dogu damagiigi, gei au nogo mmaemmae gu hoohoo bolo gaa made. Au gu deai ogu mahi ai, gu deemee di hagakono mai i au hagaduadua.

¹⁶Do hagawelewele damanaiee gu hagahuaidu au, dau dadaaligi bolo gaa hai au gii made.

¹⁷I di waalooloo di laangi dogomaalia, gei nia maa e haganiga mai i dogu gili gadoo be di mmidi o di labagee. Nia maa e haganiga mai i dogu gili i nia baahi huogodoo.