Melkahka Kan 59:3-8

³Komw mahsanih! Re awiawih ie pwe re en kemeiehla; aramas lemei kei irail me pokonpenehr pwehn uhwong ie. Maing KAUN, kaidehn pwehki ei dipadahr de wiadahr sapwung ehu,

⁴de pwehki kisin sapwung kis me mie rehi, me re mwadamwadangkipenehng nan dewerail.

⁵Maing KAUN, Koht, Wasa Lapalap, komw ketida oh ketido sewese ie; Maing Koht en Israel! Komw pein ketin mahsanih! Komw ohpala wasa oh ketin kaloke me rotorot akan; komw dehr ketin kupwurkalahngan ong me loallap suwed akan!

⁶Re kin pwurodo nin soutik, wie ngiringir duwehte kidi ni ar kin kohkohseli nan kahnimwo.

⁷Komw karonge mahs ar lokaia kepweikeng oh kamasepwehk kan. Lowarail kan duwehte kedlahs nan ewarail, re ahpw kin lemeleme me sohte me kin rong irail.

⁸Ahpw, Maing KAUN, komw kin ketin kiparamatkin irail; komw kin ketin wiahki me rotorot akan mehkot mwahl.