Mboe 59:3-8

³Yooba, re! Iŋgi wal mburanŋan ta timbuuru koŋ, mi tizaŋzaaŋa yo be tipun yo ma aŋmeete i. Tamen nio aŋkam zooroŋana som, mi aŋkam sanaana sa som.

⁴Nio aŋkam ŋoobo mbulu sa som. Tamen iŋgi tikamam kumbun be timaŋga pio sorok. Merere, maŋga mi mar lae tio. Re yo mi uulu yo pa pataŋana tio ti.

⁵Yooba, nu Anutu mburom keskeezeŋom. Nu ta Anutu kizin Israel. Zin wal ta tipizil ndemen pio mi tisu tiwe koŋ koi na, muŋai zin risa pepe. Karkari boozomen ta timbesmbeeze pu som na, ur kadoono pizin.

⁶Rou ta boozomen, koŋ koi bizin timilmiili ma timar, mi tiwwa pa kar leleene ma tiŋurŋur kembei me ta ikamam be ikan tomtom na.

⁷Re. Sua sananŋana men ta iwedet pa kwon. Mian na, kembei ta buza mataanaŋana i. Mi timototo u som. Pa tizzo ta kembei: “Asiŋ ko ileŋ yam?”

⁸Tamen Yooba, nu zeŋzeeŋge pizin. Karkari boozomen ta timbesmbeeze pu som na, nu kamam sua repiiliŋana pizin.