Melkahka Kan 46:7-11

⁷KAUN-O, Wasa Lapalap, kin ketiket rehtail; Koht en Seikop, iei atail wasahn ruk.

⁸Kumwail kohdo, oh kilang dahme KAUN-O ketin wiahda. Kumwail kilang soahng kapwuriamwei kan me e ketin wiahda nin sampah.

⁹E kin ketin katokihedi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan.

¹⁰E kin mahsanih, “Kumwail katokihedi amwail mahwen kan oh esehla me ngehi, iei Koht, me lapalahpie rehn tohn wehi kan, me lapalahpie nin sampah pwon.”

¹¹KAUN-O, Wasa Lapalap, kin ketiket rehtail; Koht en Seikop, iei atail wasahn ruk.