Mboe 46:7-11

⁷Yooba ni mbura keskeezeŋana. Mi ni imbotmbot raama iti. Anutu ki Yakop ta iwit ti mi iur ti sala kor, mi iwe seraara mbolŋana pa kanda koi bizin. Tana zin ko tirao be timbuulu iti na som.

⁸Kamar kere uraata bibip tau Yooba ikam na. Motoyom la pa uraata kini mburanŋan ta ni ikam bekena ipunmeete wal toono kan mburan na. Uraata tana, tomtom tire na, motoŋana biibi ikam zin.

⁹Ni ta ipeteke malmal ma imap pa toono ta boozomen. Mi ibogboogo peene mi izi, mi izanzan siŋgiao malmal kana mi igibgiibi sala you ma ikan.

¹⁰Mi ni iso ta kembei: “Malmal irao. Kuur niyom mi kakam kat ŋgar pio. Pa Anutu ta biibi ŋonoono na, nio tau. Karkari ta boozomen ko tipakur yo. Mi zoŋ ko iwe biibi pa toono ta munŋaana men.”

¹¹Yooba, ni mbura keskeezeŋana. Mi ni imbotmbot raama iti. Anutu ki Yakop ta iwit ti mi iur ti sala kor, mi iwe seraara mbolŋana pa kanda koi bizin. Tana zin ko tirao be timbuulu ti na som.