Melkahka Kan 31:5-18

⁵I kin mweidohng pein ngehi nin limomwi kan. Maing KAUN, komw pahn ketin doareiehla, pwe komwi Koht loalopwoat emen.

⁶Komwi kin ketin kalahdeki irail kan me kin kaudokiong koht likamw akan, a ngehi I kin likih komwi.

⁷I pahn nsenamwahu oh pereperen pwehki sapwellimomwi limpoak poatopoat. Komw kin ketin mahsanih ei lokolok; komw pil ketin mwahngih ei apwal.

⁸Komw sohte ketin mweidohng ei imwintihti kan en koliehdi; komw ketikihongieier saledek en patohseli wasa kan me I anahne.

⁹Maing KAUN, komw ketin kupwure ie, pwe I milahr nan apwal; nan poaren mesei kat tihwokilahr ei kin sengiseng; I weikeklahr mehlel.

¹⁰Solahr angi pwehki ei nsensuwed, oh sengiseng kamwotelahr mouri. I luwetkilahr ei apwal akan koaros, pil tih kat wie luhluwetala.

¹¹Ei imwintihti kan koaros, ahpw mehlel mehn mpei kan, kin mwamwahlikin ie. Irail kan me kin ese ie re masakielahr; ni ar kin kilang ie nanial, re kin tangdoaui.

¹²Aramas koaros manokeielahr, duwehte ngehi aramas mehla men, I rasehng mehkot mwahl me aramas keselahr.

¹³I kin rong mwenginingin en ei imwintihti tohto; kamasepwehk kin kapikapil ie! Re wie lamalamki ar pahn uhwong ie, re koasoakoasone duwen ar pahn kemeiehla.

¹⁴Ahpw Maing KAUN, I kin likih komwi; komwi me ei Koht!

¹⁵I kin patopato ni epwelipen nin limomwi kan ahnsou koaros; komw ketin doareiehla sang rehn ei imwintihti kan, oh pil sang irail kan me kin kaloke ie.

¹⁶Komw ketin mahsanih sapwellimomwi ladu menet ni kupwur kalahngan; komw ketin doarehkiniehla sapwellimomwi limpoak poatopoat.

¹⁷Maing KAUN, I kin likweriong komwi; komw dehr ketin mweidohng ie I en namenekla. Aramas suwed kan en namenekla; re en nennenla oh kohdilahng nan sapwen me melahr akan.

¹⁸Komw ketin katokehdi me likamw akan, irail koaros me aklapalap oh kahngohdi, me kin mwamwahliki me pwung kan.