SALMOS 31:5-18

⁵Nimitzmactilía notonal momaco. Techmanahui, TOTECO, ta tinopa Dios catli titemachtli.

⁶Niquincualancaita nochi catli quinhueyichihuaj teteyome, pampa teteyome amo tleno hueli quichihuaj. Pero na nimotemachijtoc ipan ta, TOTECO.

⁷Nijpiya miyac paquilistli pampa techicnelía. Ta tiquitztoc nochi notequipachol, tiquiximajtoc nochi catli nopantitoc.

⁸Amo techtemactili ininmaco nocualancaitacahua. ¡Amo! Campa techquetzqui tlacualca huan temachtli.

⁹TOTECO, techtlasojtla pampa niitztoc ipan tequipacholi. Nisenchocatoc hasta nijmati tlantiyohuij noixteyolhua. Ipan noyolo huan notlacayo nijmati nitlamitlaijiyohuijtoc ica tequipacholi.

¹⁰Ni tlacuajcualoli nechtzontlamiltía pampa san tequipacholi nijmati. Sesen xihuitl catli pano san nitlaayijhuía. Ya tlantinemi nochicahualis por notlajtlacolhua hasta ya nitlacayohuactinemi.

¹¹Nocualancaitacahua huan hasta nocalnechcahua nechijiyaj. Catli nechiximatij nechimacasij. Catli nechitaj ojtipa nechtlalcahuíaj.

¹²Nochi masehualme nechelcajtoque quen ya nimictosquía. Nechtlahuelcajtoque quen se chachapal tepalcatl ipan tlasoli.

¹³Nijcaqui quenicatza nocualancaitacahua nechistlacahuíaj. Yeca nechitzquitoc se hueyi majmajtli huan nechmajmatía. Inijuanti san sejco moijilhuíaj quenicatza huelise nechmictise.

¹⁴Pero TOTECO, na nimotemachía ipan ta huan niquijtohua: “¡Taya tinoDios!”

¹⁵Sesen tonali catli niitztoc momaco eltoc. Techmanahui ininmaco nocualancaitacahua catli nechtlaijiyohuiltijtinemij.

¹⁶TOTECO, ma monextis moteicnelijcayo ipan moixayac quema techtlachilía na, nimotequipanojca. Techmaquixti pampa ta techsenicnelijtoc.

¹⁷TOTECO, na nimitztemojtoc. Amo xiquincahuili para ma nechpinahualtica. Xiquinpinahualti masehualme catli amo cuajcualme. Quena, inijuanti mocamatzacuase quema tiquintzontlamiltis.

¹⁸TOTECO, ayacmo molinis ininnenepil inijuanti catli istlacatij quema ya mictose. Ayacmo itztose inijuanti catli mohueyimatij quema camanaltij para techtlaijilhuise tojuanti catli tinemij xitlahuac moixpa. Quena, xiquinmicti catli mohueyitlalíaj huan techmahuispolohuaj.