SALMOS 31:5-18

⁵Nimitzmactilía notonal momaco. Techmanahui, TOTECO, ta tiDios cati titemachti.

⁶Niquincualancaita nochi cati quinhueyichihuaj teteyome, pampa teteyome amo teno hueli quichihuaj. Pero na nimotemachijtoc ipan ta, TOTECO.

⁷Nijpiya miyac paquilisti pampa techicnelía. Ta tiquitztoc nochi notequipachol, tiquitztoc nochi cati nopantitoc.

⁸Amo techtemactili inimaco nocualancaitacahua. ¡Amo! Campa techquetzqui tacualca huan temachti.

⁹TOTECO, techtasojta pampa niitztoc ipan tequipacholi. Nisenchocatoc hasta nijmati tantiyahuij noixteyolhua. Ipan noyolo huan notacayo nijmati nitamitaijyohuijtoc ica tequipacholi.

¹⁰Ni tacuajcualoli nechtzontamiltía pampa san tequipacholi nijpano. Sese xihuit cati pano san niaxti. Ya tantinemi nochicahualis por notajtacolhua hasta ya nitacayohuactinemi.

¹¹Nocualancaitacahua huan hasta nocalnechcahua nechijiyaj. Cati nechixmatij nechimacasij. Cati nechitaj ojtipa nechtalcahuíaj.

¹²Nochi masehualme nechelcajtoque quej ya nimictosquía. Nechtahuelcajtoque quej se chachapal tepalcat ipan tasoli.

¹³Nijcaqui quenicatza nocualancaitacahua nechistacahuíaj. Yeca nechitzquitoc se hueyi majmajti huan nechmajmatía. Inijuanti san sejco moijilhuíaj quenicatza huelise nechmictise.

¹⁴Pero TOTECO, na nimotemachía ipan ta huan niquijtohua: “¡Ta tinoDios!”

¹⁵Sesen tonali cati niitztoc momaco eltoc. Techmanahui inimaco nocualancaitacahua cati nechtaijyohuiltijtinemij.

¹⁶TOTECO, ma monexti moteicnelijcayo ipan moxayac quema techtachilía na, nimotequipanojca. Techmaquixti pampa ta techsenicnelijtoc.

¹⁷TOTECO, na nimitztemojtoc. Amo xiquincahuili ma nechpinahualtica. Xiquinpinahualti masehualme cati amo cuajcualme. Quena, inijuanti mocamatzacuase quema tiquintzontamiltis.

¹⁸TOTECO, ayecmo molinis ininenepil inijuanti cati istacatij quema ya mictose. Ayecmo itztose inijuanti cati mohueyimatij quema camanaltij para techtaijilhuise tojuanti cati tinemij xitahuac moixpa. Quena, xiquinmicti cati mohueyitalíaj huan techmahuispolohuaj.