Melkahka Kan 22:7-29

⁷Koaros me kin kilang ie kin kepitkin ie; re kin kapwadehi lowarail oh itihtik moangarail.

⁸Re kin nda, “Ke likiher KAUN-O; a dahme e sohte ketin doarehkinuhkala? Ma KAUN-O kupwurkinuhk, a dahme e sohte ketin sewesehkinuhk?”

⁹Komwi me ketin apwahpwalih ie ni ei ipwidi, oh komwi me pil ketin sinsile ie ni ei seri pwelel.

¹⁰I likih komwi sang ni ei ipwidi, oh komwi kin wia ei Koht ahnsou koaros.

¹¹Komw dehr ketin dohweisang ie! Apwal laud kerendohr, oh sohte me pahn sewese ie.

¹²Imwintihti ngeder, rasehng kouwol kei, kin kapikapil ie; irail koaros kapikapil ie, rasehng kouwol kommwad en Pasan.

¹³Re sarapeseng duwehte laion kei, me kin weriwerki ar men dapengiepeseng.

¹⁴Solahr angi, I rasehngehr pihl me wudeklahr nanpwel. Tih kat koaros piselpesengehr; mohngiongiet rasehng kirihs me peipesengehr nan mesenedi.

¹⁵Nan kepinwereiet ngalangaladahr duwelahr pwelpar, oh loweiet pasdangehr pahn ngatangatei. Komw ketin likidmelieielahr nan pwelpar pwe I en mehla.

¹⁶Pwihn en aramas suwed ehu kapiliepenehr rasehng pelin kidi ehu me kohkodohng ie; re ngalispeseng pehi kat oh nehi kat.

¹⁷Tih kat koaros sansaladahr. Ei imwintihti kan kin kilikilang ie oh kangkakil ie.

¹⁸Re usuhski ei likou kan, oh nehkpeseng nanpwungarail.

¹⁹Maing KAUN, komw dehr ketin dohweisang ie! Komw ketin mwadangodo oh kapitiehla!

²⁰Komw ketin doareiehla sang kedlahs; doarehla ei mour sang kidi pwukat.

²¹Komw ketin kapitiehla sang laion pwukat; pwe sohte ei kehl rehn kouwol lawalo pwukat.

²²I pahn koasoiaiong nei aramas akan duwen wiepen nin limomwi kan; I pahn kapinga komwi nan pokon en aramas akan:

²³“Kumwail ladu en KAUN-O kan, kumwail kapinga! Kumwail kadaudok en Seikop kan, kumwail wauneki! Kumwail mehn Israel kan, kumwail kaudokiong!

²⁴E sohte ketin likidmeliehla me semwehmwe kan de mwamwahliki arail lokolok kan; e sohte kin ketin sohpeisang irail, ahpw kin ketin kupwure irail ni ar kin likweriong.”

²⁵I pahn kapinga wiepen nin limomwi kan nan pokon laud akan; I pahn kapwaiada meirong kan me I inoukidahr mwohn irail koaros me kin kaudokiong komwi.

²⁶Me semwehmwe kan pahn tungoale uwen me re anahne; irail kan me patohdohng rehn KAUN-O pahn kapinga ih. Re en paiamwahu kohkohlahte!

²⁷Tohn wehi kan koaros pahn tamanda KAUN-O. Sang ni irepen sampah koaros re pahn sohpeiong; keinek en sampah kan koaros pahn kaudokiong.

²⁸KAUN-O iei nanmwarki, oh e kin kakaun wehi kan.

²⁹Me aklapalap koaros pahn poaridi mwowe; me pahn mehla koaros pahn poaridi mwohn silangi.