A Umana Kakailai 22:7-29

⁷Diat par dia gire iau, dia nongone iau; Dia tumul; dia lungane ra ulu i diat, ma dia biti:

⁸Na nur tar ia tai ra Luluai! Ra Luluai na valaun ia! Boina ba na valaun ia, tago i manga gugu tana!

⁹Ma u kaka nam ba u ga al vairop iau kan ra tatal na bul; U ga vanurnur iau ba iau ga u boko ta ra u i nagu,

¹⁰Papa nam ra bung iau ga irop tana ta ra tatal na bul u ga puapuak iau; Ma ba iau ga ki boko ta ra bala i nagu, u kaugu God.

¹¹Koko u ki vailik kan iau, tago a purpuruan i maravai, Ma pa ta na ba na maramaravut.

¹²Mangoro na bulumakau, a umana tomotoina, dia tar tur kikilane iau; A umana dekdek na bulumakau, a umana tomotoina, maro Basan dia tar tur kikil iau.

¹³Dia pangapanganga tadav iau da ra leon i varvarkarat ma i kukukula.

¹⁴Di lingire vue iau da ra tava vakuku ka, Ma ra umana urugu par dia taele; A nuknukigu i da ra bulit na livur; I polo ko ta ra balagu.

¹⁵A dekdekigu i lageo da ra ngungu kabala na pia; A karameagu i petapetep ta ra kabegu; Ma u tar vadiop vaba iau ta ra tobon na minat.

¹⁶Tago a umana pap dia tur kikil iau; A kor na tarai, a umana tena kaina, dia balade kikil iau; Dia tar go ra ura limagu ma ra ura kaugu.

¹⁷Pa i dekdek ba ina luk guve ra umana urugu par, Ma diat dia giragire iau, ma. dia nongone iau.

¹⁸Dia tibe kaugu umana mal ta diat mulai, Ma dia padapadailam ure kaugu olovoi.

¹⁹Ma u Luluai, koko una ki vailik; U kaugu tena maramaravut, una lulut upi una maravut iau.

²⁰Una valaun iau kan ra pakat na vinarubu; Ma kaugu kopono ko una valaun ia kan ra dekdek i ra pap.

²¹Una valaun iau kan ra ngie i ra leon, Maia pa, kan ra it i ra bulumakau, a kuabar, u tar torom tagu.

²²Ina vaarike ra iangim pire ra umana turagu; Ma ina kakailai na pite varpa tam livuan ta ra tarai na lotu.

²³Avat ava ru ra Luluai, avat a pite pa ia; Avat par a umana bul mur tai Iakob, avat a mar ia; Avat par a umana bul mur tai Israel, avat a ururian tana.

²⁴Tago pa i ga pidimuane, ma pa i ga milikuane ra kaina kini kai nina i malari; Ma pa i ga ive ra matana kan ia; Ma ba i ga kail tadav ia, i ga valongore.

²⁵Kaugu pite varpa livuan ta ra kor na tarai i vuna tam; Ina pait ot pa kaugu lavur kunubu na vavalima ta ra luaina mata i diat dia ru ia.

²⁶Diat i madu ra maukua i diat, diat a ian ma diat a maur; Diat dia mainge ra Luluai, diat a pite pa ia; Boina ba ra bala i vavat na laun pa na mutu!

²⁷A umana ngungu par ta ra rakarakan a gunagunan diat a nuknuk pa mule ma diat a lilikun pire ra Luluai; A umana apik par ta ra lavur vuna tarai diat a lotu tadav u.

²⁸Tago ra Luluai iat i vatur vake ra varkurai; Ma ia iat ra Luluai kai ra lavur vuna tarai.

²⁹Diat par dia tubu ta ra rakarakan a gunagunan diat a ga ian ma diat a ga lotu; Diat par dia to na mat, diat a va timtibum pirana, Maia pa, nina bula ba i mama valaun mule.