Sam 22:7-29

⁷Sari doduru pu dogorau si va sisire nau, na pesipesi va kaleanau rini na qenoqeno batudi.

⁸“Dotu, kalavarae si asa koe Zihova,” gua si arini. “Ba venagua ke lopu harupia tu e Zihova si asa? Be guana qetuqetu nia e Zihova si asa si mani va sarea tu,” gua si arini!

⁹Ba Agoi tugo si va podo vura au pa tiana sa tinaqu, meke Agoi tugo kopu nau na va sare au totoso haha si rau.

¹⁰Podalae guatu podo rau si kalavarae atu mo koa Goi, meke Agoi mo sa qua Tamasa doduru totoso.

¹¹Mu lopu koa va seu koa rau, ura tata mae sa tinasuna koa rau, meke loke tie si koa pude toka nau.

¹²Soku sari na kana pu koa varidikue nau, guana bulumakao kokoreo, kekeṉoṉo gua na bulumakao variva matedi pa popoa Basani.

¹³Zama ṉoṉovala au rini guana laione pu va ṉaṉari rini sari na ṉuzudi, pu kurumu aqa pude garatau.

¹⁴Malohoro sa tiniqu, ta zoropo palae sa qua ṉiniraṉira guana kolo, sari doduru vinari hodae susuriqu si zokezoke beto, lodu mate pa tinalotaṉa sa buloqu.

¹⁵Loke qua ṉiniraṉira guana keke bele raro patu popana, sa meaqu si napiti pa damaqu; veko pani au Goi pa vasina tana minate.

¹⁶Mae vari likohae nau na puku tie kaleadi; kekeṉoṉo guana rovana siki variva matedi si arini. Pokai rini sari na limaqu meke nenequ.

¹⁷Boka naei mo rau sari doduru susuriqu; doṉo toto mae au rina qua kana.

¹⁸Vari hiani meke vari mudumudukeda ni rini sari qua poko.

¹⁹Kei, Zihova, Mu lopu koa va seu koa rau; Mu tuturei mae va sareau.

²⁰Kei, Zihova, Mu va sareau koasa magu varipera, Mu harupia sa qua tinoa koasa ṉiniraṉira tadi na tie kaleadi, pu guana siki variva matedi.

²¹Mu va sareau koasa ṉiniraṉira tadi na qua kana pu guana laione, meke gua ri na kikihodi rina bulumakao kokoreo.

²²Kaqu tozi vura nia rau sa Pozamu koari na turaṉaqu, kaqu vahesigo rau pa vari korapana sa vinarigara tadi na tinoni.

²³Mi vahesia si Asa, gamu pu pamaṉa nia se Zihova. Mi va lavatia si Asa, gamu na tutina e Zekopi. Mi va ululia sa pozana Sa, gamu na tutina Izireli!

²⁴Lopu etuli Sa sari na habahuala, babe muliṉini sari na dia tinasigiti. Meke lopu va mudi pani Sa, ba olaṉi Sa sari na dia tinepatepa la koa Sa.

²⁵Pa korapana sa vinarigara vinahesi tadi doduru tie te Tamasa si kaqu vahesigo rau koa gua rina Mua tinavete. Pa kenudi rina tinoni pu va tabe igo si kaqu taveti rau sari doduru pu ele va tatara nigo rau.

²⁶Sari na habahuala si kaqu tava deṉa valeana, arini pu hata ia se Zihova si madi vahesi zoṉazoṉa ia, madi toa hola ninae rane ka rane.

²⁷Doduru butubutu si kaqu balabala ia se Zihova, arini pa hopeke kukuruna sa kasia popoa si kaqu kekere la koa Sa, meke sari doduru votivotiki butubutu tie si kaqu vahesia si Asa.

²⁸Sa ṉiniraṉira tana binaṉara si te Zihova tugo. Baṉara ni Sa sari doduru butubutu.

²⁹Sari doduru tie ravutudi pa kasia popoa si kaqu todoṉo meke vahesia si Asa. Sari doduru pu gore la pa minate si kaqu hoqa todoṉo pa kenuna Sa, sari doduru pu lopu boka toa hola pa pepeso.