Salmos 22:7-29

⁷An-dakarmalale, anga alliardamalad. Anga akar-akar gunanai damarbalid, nono ege-ege gunanai damarbalid. Weyob sogmalad:

⁸“Bab-Jehováʼgi bensurye-sogdiid, degite, Bab-Dummad e-bendakdado. Bab-Dummadgi-wergudiiye-sogdiid, degite, Bab-Dummad-e-sunnagwad we-ibmargi e-ollor-imakdado.”

⁹Bab-Dummadye, sapidukugi-an-maigu, bee be an-odenonikid. An-nan-nukugi nue-obunnogega be an-imaksabalid.

¹⁰Bab-Dummadye, sapidukugi-an-maigu, be nue an-akwisad. Amba sapidukugi-an-maigu, bato be an-Bab-Dummadid.

¹¹Bab-Dummadye, mer wargwen be an-mete, ar an surbinsa itoged, ar dule-an-bendaked gwen nikasulid.

¹²An-isdarmalad an-ebiris gudimalad, Basán-moli-bebe-nikad-ursirmaladyobi an-ebiris gudimalad.

¹³Igi-achumigur masbina uurmaknagusdae, igi-san-gasale, ichimaknagusdae, deyob, an-isdarmalad angi gwisgunonimalad.

¹⁴Dii-napagi-eolenaiyob bela an-san na itoged, bela an-garmar nue-gwatiris itolebalid. Igi-baka-gwallu soo-abin daluddae, deyob, an-ulubgi an-gwage nade an itoged.

¹⁵Dobedba bela an-gaya dinguded. An-gwabinse-bakale, gege bar banamakgusad. Napa-urba bato ber an megisayob na itoged.

¹⁶Dule-isganamar achu-soemaladyob an-ebiris gunanaid. Bela an-argan, an-nag-matarse-bakale, uudu imaksamalad.

¹⁷An-garmar daled daklegusad. An-isdarmaladi an-indaknanaisulid, an-ebiris an-dakbukwad.

¹⁸An-mormar mimismarsunnad, an-mor-suega, egi wilubdaknanai gusmalad.

¹⁹Bab-Jehováʼye, be an-niga-ogannogedid. ¡Mer be angi bangue! ¡Gwae be an-bendakdage!

²⁰Mer es-suidse-oburgwilegega be an-imake. Dule-achumaryob-gudimaladgi be an-bendake.

²¹Achumigur-nono-wawaadyob-gudimaladgi be an-bendake. Moli-bebe-nikad-ursirmaladyob-gudimaladgi be an-ollor-imake.

²²Bab-Jehováʼye, an-gwenadganga an begi sunmakoed. Dulemar-onmaked-abargi an be-nug-odummogoed.

²³Bemar, Bab-Jehová-dobekwaa-gudimalad, Bab-Jehová-e-nug odummomar. ¡Jacob-e-wagan! Bab-Jehová-magar-dakdii nanamar. ¡Israel-e-wagan! Bab-Jehová-e-nug odummomar.

²⁴Bab-Jehová, dule-wileged-e-naibi-itodiid baisur-daksulid, wagar-biria daksulid. We-dule-ese-gollalile, abin-imaked.

²⁵Bab-Jehová, be-dulamar-onmaked-abargine, be-nug-odummogega be an-imaked. An bega ibmar-imakoye-sogsadi, dulemar-be-nug-odummodimalad-asabin an bega imakoed.

²⁶Dule-wilemalad nue immeledmaloed. Dule-Bab-Jehová-amidimalad, Bab-Jehová-e-nug-odummodimalad, e-ulubgi weligwar-itodmaloed, deyob sadegu gudmaloed.

²⁷Bela we-napneggi-dulemar-yar-baid-baidgi-bukwamalad, dulemar-ablis-akar-akar-bukwamalad-ugakaasega, Bab-Jehová-ebinsadmaloed, Bab-Jehováʼse gannar aibirnonimaloed, sindigar abin ambikunonimaloed.

²⁸Ar Bab-Jehová bela we-napneg ganikid, bela dulemar-bukwad, e-argan-yaurgi gudidiid.

²⁹Dule burgwesuli geg gued. Degisoggu, bela we-napneggi ibmar-bukidar-nikagudimalad, dulemar-burgwedani-gudimalad, Bab-Jehová-asabin sindigar sigmaloed, e-nuggi iba onomaloed.